Educación va facer de baldre tola estaya d'enseñanza de 3 a 6 años

La enseñanza de 3 a 6 años ye una estaya educativa non obligatoria que se da en centros públicos y que tamién ufierten los centros particulares. Dende'l gobiernu del PP n'Asturies, na llexislatura 95-99, funcionen 72 aules concertaes cola alministración, mientres que les demás aules que funcionen na privada son de pagu. Les directives de los centros concertaos llevaben tiempu apertando pa que'l númberu d'aules subvencionaes pola alministración xubiere, ello nun contestu en que les solicitúes de matriculación nos centros de la rede particular xubíen mientres los centros públicos diben quedando vacios. La selmana pasada'l Gobiernu asturianu, n'aplicación de la Llei d'Enseñanza, diera anuncia de que diba esparder el calter gratuitu d'esta enseñanza a tolos centros concertaos, una midida que va suponer la concertación de cerca de 180 aules n'Asturies y que se concretó ayeri cola robla del alcuerdu de concertación ente Educación y la patronal de la privada. La patronal qu'axunta a los centros d'enseñanza católicos, FERE-CECA, declaró nun comunicáu que "la non concertación universal d'Infantil suponía una torga pa los padres de los sectores más desfavorecíos de la sociedá, sobremanera los inmigrantes". Más esplícitu foi'l so secretariu xeneral, José Luis Ampudia, que dixo que la midida "va abrir les puertes de les escueles privaes al mundu de la marxinación, que nun tenía accesu a les nuestres clases".

Ello ye que de mano anunciárase que'l Gobiernu Central diba asumir el coste de la concertación d'estes aules, pero'l Conseyeru d'Educación José Luis Iglesias Riopedre reconoció ayeri que nun va haber fondos estatales pa pagar la concertación nel primer trimestre del cursu 2006-2007, polo que va ser el mesmu Principáu d'Asturies el qu'arrecostine col coste, que se perita, pa esi primer trimestre, en cerca de 2,4 millones d'euros que l'alministración asturiana va tener qu'adelantá-y a la patronal de la enseñanza particular. Dempués de la negociación con Madrid, qu'entovía ta pendiente, verase como se van financiar d'ehí en p'alantre los cursos enteros, que van costar ente 6 y 7 millones d'euros.

Los sindicatos d'enseñanza asturianos con representación na pública nun tan d'alcuerdu cola midida, que yá s'aplicaba n'otres comunidaes autónomes y que tien el sofitu llegal de la mesma Llei Orgánica d'Enseñanza. Representantes de CC OO, SUATEA y CSI-CSIF concentráronse énte la sede de Presidencia y denunciaron lo que pa ellos supón una tendencia a la privatización y un tresvase de perres de la pública a la particular.

Beatriz Quirós, del sindicatu SUATEA, sorraya que los 2,4 millones d'euros que van adelantase pol Principáu, suponen una gran cantidá que nun taba conseñada nos presupuestos asturianos pa esti exerciciu, colo que s'entruga d'au van salir les perres pa ello. La representante sindical, tien mieu de que pa financiar la concertación se retiren fondos de la enseñanza pública, y denuncia qu'ello va agravar "la dinámica de tresvase de fondos de la enseñanza pública al sistema priváu, que se beneficia de la falta d'inversión en centros públicos p'atropar más alumnos". Como casu prácticu, la sindicalista pon el de los barrios construyíos más de recién en Xixón, onde la falta d'aules na escuela pública "empobina a los padres a matricular a los sos fíos na particular, ello arriendes d'otres dinámiques que lleven a munches families a preferir los centros particulares, anque tengan que pagalos, por una cuestión de prestixu social."

Contra la idea que se defende dende la patronal de la escuela particular, dende SUATEA sorráyase que'l testu de la Llei d'Enseñanza que s'aprobó apocayá en Congresu da-y privilexos a la escuela privada concertada que van afondar na dixebra social ente escuela pública y particular, al ser cada centru concertáu el que va apautar los criterios pa escoyer el so alumnáu, al consentise que se-yos cobre cuota a les families nos centros concertaos y al obligar al escolín a "aceptar l'ideariu del centru".