Educación espubliza’l material didáuticu de la Selmana de les Lletres pa escolinos de Secundaria

La web Educastur colgó na rede’l material que los escolinos de Secundaria van trabayar ente’l 30 d’abril y el 4 de mayu pa la XXXIII Selmana de les Lletres. Efrén d’Andrés encargóse de los dibuxos y Marta López Fernández, de los testos.
 
Con un formatu de periódicu, de nome ‘Sieglu XVIII’, los autores pretenden averar a los escolinos y escolines los autores asturianos de la Ilustración, dómina a la que ta dedicada esti añu la Selmana de les Lletres. Asina, esti material, compuestu por 23 páxines, va servir d’apoyu a los alumnos pa conocer la vida y testos d’autores como Bruno Fernández Cepeda, Antón Baldivares Argüelles, Xosefa Xovellanos y Gaspar Melchor de Xovellanos, ente otros, asina como dellos personaxes de la Ilustración. Dende la web anuncien más actualizaciones pa los díes próximos, tamién pa Infantil y Primaria, onde yá tán colgaes delles actividaes coles que trabayar esos díes col alumnáu.
 
Otra manera, coincidiendo tamién cola Selmana de les Lletres, la Casona del Bravial, en Blimea, va acoyer una serie d’actividaes empobinaes “a que les xeneraciones más moces s’aficionen a la lliteratura n’asturianu y conozan toles cuestiones qu’arrodien a la llingua y al so procesu de normalización”. Asina, el llunes 30 d’abril va inaugurase la esposición ‘Campañes de normalización llingüística nel Conceyu de Samartín’ na que los visitantes van poder conocer toles iniciatives que la Oficina de Normalización Llingüística entamó dende la so creación, nel 2005, hasta la fecha. La muestra va tar abierta al públicu tol mes de mayu nel horariu siguiente: llunes, miércoles y xueves, de 9 a 14 hores, y los martes y vienres, de 11 a 13 y de 17 a 20 hores.
 
Los alumnos de Secundaria del conceyu van averase estos díes a Blimea pa ver la esposición y, al mesmo tiempu, conocer el furrulamientu del Muséu de la Memoria y de la Oficina de Normalización Llingüística. Amás, el xueves, a les 10.30 hores, va tener llugar la presentación de llibru ‘Memoria del monstruu’, de Dolfo Camilo Díaz, premiu Montesín de Lliteratura Xuvenil del añu 2010.
 
Amás d’estes actividaes concretes pa esos díes, Samartín de Rei Aurelio tamién prepara un programa pa neños y neñes de Primaria alredor del Día del Llibru (23 d’abril) y la Selamana de les Lletres. Asina, van celebrase cuentacuentos, visites a biblioteques, talleres lliterarios y teatru, cola representación nel Teatru Municipal, el día 25 a les 11.30 hores, de l’adaptación asturiana de la ópera de Mozart ‘Los amorinos de Bastián y Bastiana’, de Producciones Nun Tris. Pese a tar destinada a escolinos, los adultos tamién van tener accesu al recintu hasta completar aforu.
 
Inciativa en Facebook
 
La Oficina Municipal de la Llingua de Samartín del Rei Aurelio quier involucrar a tolos asturianos na celebración de la Selmana de les Lletres, pa lo que va abrir el so perfil en Facebook esos díes pa que tol que quiera pueda dexar una muestra del so amor pa cola lliteratura asturiana o incluyan un testu de dalgún autor que-yos preste. D’igual forma anima a que tolos usuarios d’esa rede social, la más numberosa, ponga un llibru n’asturianu como semeya de perfil. Ente toles persones que participen nesta iniciativa, la Oficina va sortiar un llote de llibros.