Educación axudica les cuatro places pendientes de gallego-asturiano

Los colexos d’A Veiga, Navia, Ibias y Villayón que taben ensin maestru de gallego-asturiano van disponer de profesor dende’l llunes, día nel que van espublizase les llistes definitives d’asturianu. Tovía queden 23 colexos ensin maestru.
 
La Conseyería d’Educación y Universidaes namái axudicó una de les 24 places pendientes: la del Colexu Públicu José Bernardo de Llangréu. D’esta forma, los escolinos y escolines de Llingua Asturiana en Primaria d’un total de 23 escueles nun van poder dar clase de la so llingua materna hasta, al menos, el 3 d’ochobre. Esti llunes ta previsto que s’espublizen les llistes denifitives d’asturianu que se dieron a conocer el sábadu con 93 maestros y maestres, polo que s’espera que la selmana qu’entra la conseyería axudique de manera definitiva estes places.
 
Ente les escueles que tovía anden ensin profesor de Llingua Asturiana tán el Colexu Públicu Xentiquina, de Lieres, conocíu pol grupu musical infantil qu’entamó nél Nacho Fonseca y que da nome al centru; el Colexu Públicu Padre Galo, de Ḷḷuarca; la Escuela Agrupada Rural Valle del Güerna, que tien en marcha un procesu de normalización llingüística integral; y trés colexos de Cangas del Narcea –toes escueles rurales agrupaes– y de Tinéu.