Educación asoleya les bolses d’interinos pa llingua asturiana y gallego-asturiano

La Conseyería d'Educación y Ciencia del Gobiernu asturianu asoleya yá na so web oficial les bolses d'interinos pa impartir asturianu y gallego-asturianu que colectivos d'interinos y aspirantes a poner clas d'asturianu llevaben tiempu reclamando que se ficieren. Les bolses, provisionales, estremen n'asturianu y gallego-asturianu pa secundaria y tamién faen otru tanto en primaria.

Na web Educastur puen consultase les resoluciones provisionales sobre escluyíos y almitíos nesta bolsa nueva que va amestase como complementaria a la llista d'interinos actual y que data del añu 2000. Dende qu'escosare esa llista d'interinos, Educación llevaba un tiempu aplicando una normativa escepcional pa la contratación de los interinos adicionales que precisaba, un procedimientu que dende grupos d'interinos y aspirantes viose siempre como daqué arbitrario y anormal, creándose nel cursu pasáu una plataforma d'interinos a costafecha pa desixir la creación d'esta bolsa, procedimientu po que se manda educación pa toles demás materies.


Fontes sindicales consultaes por Asturies.com na central SUATEA declararon que'l procedimientu pa la creación d'estes bolses foi normal dafechu y cuasimente en paralelu a otres bolses que s'abrieron pa les materies de tuba y mantenimientu de maquinaria, anque lleven recibiendo dende que se dieron a conocer bien de llamaes de los sos afiliaos interesaos nel asuntu y que tienen les duldes lóxiques nestos casos referentes al sistema de baremación pol que se mandó la conseyería pa facer les bolses. Sicasí, SUATEA llamentó que l'alministración nun contare con ellos pa la mesa de negociación sobre estes bolses por nun firmar nel so día'l sindicatu l'alcuerdu sobre interinos cola alministración.


Les bolses estremen per primer vegada ente docentes d'asturianu y de gallego-asturianu, cosa que nun asocedía hasta agora na llista d'interinos, siendo que se llamaba a tolos maestros de la mesma llista.