Educación abre bolses d’asturianu y gallego-asturianu

L'apertura d'estes bolses va regular l'accesu de nuevos aspirantes a places de mayestru d'asturianu en primaria y secundaria y despeslla la situación d'allancamientu na que se llevaba dende que s'escosaron les llistes d'interinos.

Los aspirantes tienen d'agora en p'alantre venti díes naturales nos que puen apuntase pa estes bolses que yá tan asoleyaes oficialmente y que puen consultase na web de la Conseyería d'Educación. La convocatoria estrema ente asturianu y gallego-asturianu y amás ye doble, afectando a primaria y a secundaria.

L'apertura de bolses d'interinos cubre una demanda de vieyo de sindicatos d'enseñanza y colectivos d'interinos, que dende'l cursu pasáu taben denunciando les irregularidaes y arbitriaridaes que se derivaben del fechu de que la llista d'interinos de secundaria llevare escosada dende diba cuatro años ensin que quedare naide por llamar de la mesma pa cubrir plaza nenguna de mayestru d'asturianu. Anque'l procedimientu normal nestos casos ye'l d'abrir una llista nueva, Educación fizo una disposición transitoria cola que s'otorgaba autoridá pa llamar a docentes d'otres llistes. Gracies a esta disposición, la Conseyería siguió ensin abrir una bolsa nueva que s'amestare darréu de la llista d'interinos y concediose autoridá pa llamar a persones que tuvieren apuntaes n'otres llistes con tal de que certificaren capacitación pa dar asturianu y tuvieren daos d'alta nel rexistru de capacitación, dalgo qu'enritó a bien d'aspirantes y interinos que se quexaben de lo que-yos paecía un métodu arbitrariu y poco tresparente por parte de l'alministraciónd'accesu a la función docente, amás de suponer un agraviu comparativu que facía de menos l'asignatura d'asturianu.

La publicación güei d'esta convocatoria supón polo tanto una regularización de la situación esistente, como esplicaron a Asturies.com dende la secretaría de llingua del sindicatu d'enseñanza SUATEA. Representantes de la plataforma d'interinos que se fexo l'añu pasáu pa demandar la creación d'estes bolses espresaron tamién el so contentu pola decisión d'educación, anque, como alvierten dende SUATEA, la midida llega un poco tarde y va poder aplicase más pal cursu qu'entra que pa esti, en cuantes qu'ente que se dean tolos pasos llegales y trámites pa la creación de la bolsa, esta nun va tar operativa hasta posiblemente'l mes de marzu del 2006.
Más información na web de la Conseyería d'Educación