Edítase la primer novela de Berta Piñán

'Como la muda al sol d’una llagartesa' foi la obra ganadora del XXXVIII Premiu Xosefa Xovellanos, correspondiente al 2017.

La primer novela de Berta Piñán ye un thriller d'ambientación rural con un pareya de muyeres mayores como protagonista. Nel maizal d'una d'elles, Xuana Salabert, apaez una mañana el cadabre d’una moza, pero enantes de poder avisar a la Policía tres el descubrimientu recibe un golpe que la dexa inconsciente. Cuando despierta, yá nun habrá rastru del cadabre.

Esta obra, editada por Hoja de Lata, va presentase güei en Xixón y mañana n'Uviéu. El primer actu va tener llugar a les 19.30 hores nel llar del Atenéu Obreru de Xixón, y nél van participar, amás de l'autora, María Cristina Valdés, direutora xeneral d'Universidaes y Investigación; Marta Mori, vicepresidenta de l'Academia de la Llingua Asturiana; y Luis Pascual, presidente del Atenéu Obreru de Xixón.

Mentes, la cita d'Uviéu va ser a les 12.30 hores na Biblioteca de La Granxa, cola presencia tamién de Piñán.