Ecoloxistes recurren l’ampliación de la cantera de Latores

La Coordinadora Ecoloxista presentó recursu de reposición contra l'autorización de la Dirección Xeneral de Mines d’autorizar l'ampliación de la cantera de Latores allugada na localidá de Cellagu  n'Uviéu.

Según informaron los ecoloxistes, la esplotación de caliza ocupa una superficie total de 273.710 metros cuadraos y la última ampliación que se-y concedió foi publicada nel  Boletín Oficial del Principáu d'Asturies en 1995.

"Una vegada más el Principáu tolera los incumplimientos ambientales continuos de les canteres, non solo dexa esta situación sinón qu'autoriza l'ampliación ensin arreglar estes irregularidaes, lo que supon un tratu de favor a les empreses qu'incumplen les normes de forma repitida y continua", llamenten dende la Coordinadora.
  
Incumplimientos
Asina, señalen qu'existen "incumplimientos", como que nun s'acometieron los llabores de restauración y revegetación, que l'ampliación va afectar a la Reserva Natural Parcial de La Cueva de Les Caldes, que nun existe malla cinexética, que nun se cumplen les condiciones pa protexer el sistema hidrolóxicu o que nun se respeten les condiciones de protección del mediu atmosféricu, superándose amás los niveles d'emisión de ruiu.