Ecoloxistes planteen el peligru de les balses de residuos

La Coordinadora Ecoloxista d’Asturies plantea qu’un accidente como’l de la balsa de residuos n’Hungría podría pasar n’Asturies. Añaden amás qu’equí los efectos seríen peores pol “tamañu y peligrosidá” de les balses asturianes.

Per toa Asturies hai balses de residuos tóxicos, pero los ecoloxistes consideren que les dos más peligroses son les que s’alcuentren “na antigua esplotación de Río Narcea Gold Mines”, nel conceyu de Belmonte.

“Les dos balses son 4’7 veces mayor que la balsa de la catástrode d’Hungría y más tóxiques que la siniestrada”, apunta la Coordinadora Ecoloxista mientres recuerda que yá denunciaron nel pasáu les irregularidades d’eses balses.

La primera de les balses recibió n’agostu de 1996 autorización del Principáu y clausoróse en 2008, pero según los ecoloxistes “sigue calteniendo’l riesgu”. La segunda, construyóse “ensin tener autorización nenguna per parte del Principáu nin llicencia del Ayuntamientu”, esclariaron dende la coordinadora.

Gran impactu
“Cualesquier accidente como’l d’Hungría contaminaría’l ríu Cauxa y el Narcea d’un mou mui grave”, alvierte la Coordinadora Ecoloxista d’Asturies. Según ellos, l’impactu diba ser pa flora y fauna y causaría “daños irreparables a l’actividá agrícola, ganadera y forestal de les sos orilles”.