Ecoloxistes n’Acción llama l’atención sobre los vertíos al Ríu Navia

El grupu conservacionista Ecoloxistes n'Acción emitió ayeri un comunicáu en que daba anuncia de la xuba de los vertíos directos al ríu Navia que fai la empresa Industrias Lácteas Asturianas dende l'añu 2001 .


Según Ecoloxistes, qu'emplega datos oficiales del Rexistru Estatal d'Emisiones y Fontes Contaminantes (EPER), qu'emplega datos de les mesmes empreses, los vertíos de la empresa alimentaria na so fábrica del Conceyu de Navia presenten una xuba constante dende l'añu 2002. Asina, la suelta de Carbonu Orgánico Total d'esta empresa n el 2001 yá yera de les más importantes dientro del sector agroalimentariu con 1.200 tonelaes, una cifra que l'asitiaba nel tercer puestu ente más de cuatrocientes fábriques del ramu en toa Europa y como la primera del Estáu Español
Acordies colos datos más nuevos que se conocen, la empresa vertió 1.330 tonelaes d'esti productu nel 2002 y llegó a les 1.400 nel 2003.

La concentración de vertíos contaminantes ye tan alta qu'incluso nes semeyes aérees del Serviciu de Cartografía del Gobiernu asturianu ye a vese claramente la mancha que fai la entrada de vertíu dende la fábrica nel Ríu Navia (ver semeya qu'acompaña a esta noticia)

Énte esta situación la organización ecoloxista diz que se punxo en contactu col Principáu y cola Conferederación Hidrográfica solicitando información sobre la situación ambiental de la empresa, el grau de cumplimientu que tien de les autorizaciones de vertíu que tien y los controles que se faen nes sos instalaciones.

Ello vien a pasar cuando ta amás pa echar a andar un apartáu de la llei 16/2002 de Prevención y Control de la Contaminación que va obligar a les empreses a adaptase a les condiciones ambientales per aciu d'una autorización ambiental integrada enantes del 31 d'avientu del 2006


El Carbonu Orgánicu nun tien efectos demostraos sobre la salú humano, pero pue desaniciar la vida nos ríos, dañando muncho a pexes y otros organismos vivos al escosar l'osíxenu presente nel agua, ello aparte de que l'agua contaminao pue ser fediondo.