Ecoloxistes n’Acción denuncia que munches empreses asturianes carecen d’Autorización Ambiental

Decenes d'empreses asturianes podríen quedar en situación illegal si nun tienen, enantes del 30 d'ochobre d'esti añu, la so llicencia d'Autorización Ambiental Integrada. Esti documentu, obligatoriu n'aplicación de la Llei de Prevención y Control Integráu de la Contaminación, nun tán en condiciones de cumplilu un bon garapiellu d'empreses asturianes, según denunció la organización "ecoloxistes n'acción" nun comunicáu de prensa.

Los ecoloxistes acuden a datos del ISTAS-Institutu Sindical de Trabayu, Ambiente y Salú, dependiente de CC.OO. p'afirmar que, de les 5.000 empreses afectaes pola llei n'Asturies, a últimos del 2006 solamente la teníen concedida 1.000 mientres qu'otres 1.000 aproximadamente taben en fase de tramitación. Teniendo en cuenta que'l plazu mediu pa llograr la llicencia ye de cerca de quince meses, n'Ecoloxistes n'Acción albidren que cerca de 3.000 instalaciones industriales podríen quedar fuera de la llei cuando esta entre n'aplicación pal mes d'ochobre. La Unión Europea yá alvirtió que la entrada en serviciu de la Llei pa esa fecha ye inaplazable.



L'Autorización Ambiental garantiza que la empresa cumple cola normativa ambiental y tamién certifica'l so compromisu cola mengua d'emisiones contaminantes al traviés d'un protocolu p'adoptar "les meyores técniques disponibles". El retrasu de l'aplicación de la Llei n'Asturies deberíase, según los ecoloxistes, a delles causes, ente elles la falta de medios humanos y técnicos nes conseyeríes afectaes y tamién la calidá probetaya de los documentos técnicos presentaos poles empreses, lo qu'obliga a solicitá-yos más información por parte de les alministraciones.