Ecoloxistes n’Acción denuncia descontrol sobre la contaminación del aire

La organización Ecoloxistes n'Ación d'Asturies denunció que dempués desolicitar en Conseyería de Mediu Ambiente los datos de presencia nel aire referentes a sulfuru d'hidróxenu o ácidu sulfhídricu (SH2) la rempuesta del Principáu foi que talos datos "nun esisten" en cuantes que "los contaminantes bencenu y sulfuru d'hidróxenu nun se miden en nenguna estación d'Asturies".

El grupu ecoloxista diz nun salir del plasmu al conseñar que'l Gobiernu asturianu nun toma la midida de la presencia nel aire d'esti compuestu que vien del formentao de restos inorgánicos d'azufre y que suelen producir les refineríes de petróleu y les fábriques de pasta de papel, como la qu'esiste en Navia. Los ecoloxistes alvierten qu'esti contaminante, que suelta un fedor característicu a güevos podres ye'l responsable , incluso cuando namás ta presente en pequeñes concentraciones, de daños nel aparatu dixestivu, y nel sistema nerviosu, causando tamién trestornos nel sueñu.

Al grupu que coordina Paco Ramos abúlta-y especialmente grave que nun se controle esti contaminante, y apurre datos esmolecedores al respective, como ye'l casu de que na estación cántabra de control del aire de Barreda (Torlavega) na redolada de la papelera de SNIACE el Valor Tope Diariu de 40 µg/m³ perpásase hasta 9 ocasiones al añu, llegando a midise nun día 60,9 µg/m³ y con emisiones puntuales d'hasta 702,3 µg/m³.

En viendo los adtos de la comunidá vecina, Ecoloxistes n'Acción estima que ye "inaceptable" que nun se mida la presencia d'esti contaminante na Ría del conceyu de Navia, onde la población pue tar espuesta a valores de contaminación mui penriba de los topes llegales y con graves efectos sobre la salú.