Ecoloxistes esixen la paralización de la Y de Bimenes

La Coordinadora Ecoloxista d’Asturies, denunció ante la Viceconseyería de Mediu Ambiente y ante la Confederación una serie de "graves afecciones ambientales" que vienen produciéndose na Y de Bimenes al so pasu per Lieres.

Pa los ecoloxistes, estos daños son “bien esmolecedores y na mayoría de los casos estrapolables a tola obra polo xeneral”. Por ello’l colectivu esixe la paralización inmediata de diches obres.
  
Según informó esti miércoles la Coordinadora, “los daños causaos pola destrucción y fragmentación del hábitat que ye necesariu facer pa la realización d'una obra d'esti calibre son escomanaos".
  
Nesti sentíu los ecoloxistes consideren que se tomó'l trazáu más complicáu y nun se tán tomando les decisiones afayadices pa que la construcción de la vía rápida y el so futuru funcionamientu sían seguros y tengan el menor impactu ambiental posible.
  
"Los desmontes que se tán desendolcando son enormes, el so ángulu y el so enorme altor provoquen y van provocar nel futuru desprendimientos sobre la vía", destacaron los ecoloxistes qu'alvirtieron amás de que tán siendo baltaes toes aquelles laderes próximes al trazáu, esaniciando d'esta miente l'únicu factor natural que torga la erosión del suelu y les fanes de tierra.
  
Daños al Ríu Nora
Indicaron amás que los trabayos tán tan cerca del Ríu Nora y metiéronse tantu por él emburriando tierres escontra'l so calce que'l pesu de la maquinaria y el del propiu suelu movíu provocaron que parte de la escollera d'enriamientu del ríu se fuera abaxo y tea agora mesmu en mediu del calce.

Tamién s'esanició gran parte de la vexetación de ribera y la turbieza de les agües ye bien alta por mor de los trabayos.
  
"La última acción que tán plantegando pa evitar que'l monte enteru se venga abaxo ye la colocación d'enormes pivotes de formigón a gran fondura pa estabilizar el terrén a tan solo unos pocos metros del Nora, lo que va provocar un arramáu al ríu por escorrentía y filtración nel sosuelu de sustances altamente básiques, que va afectar de forma negativa a tol ecosistema enagües embaxo", indicaron.
  
Por too ello, la Coordinadora pidió que se paralice l'actividá constructiva mientres nun s'adopte per parte de la U.T.E. les midíes necesaries pa correxir tolos defectos detectaos.