Ecoloxistes denuncien derrames na ría de Niembru

La Coordinadora Ecoloxista d’Asturies denunció énte la Fiscalia de Mediu Ambiente los derrames que produz la factoría Agar de Asturias S.L en Llanes. Los ecoloxistes sorrayen qu’estos derrames acaben na ría de Niembru.

Agua con temperatura abondo alta y con un fuerte olor son dalgunes de les razones nes que se basen los ecoloxistes p’alvertir de que “la depuradora que tien la factoría nun furrula bien”, daqué que, según alerten, pue convertise nun “delitu ambiental con consecuencies pa la salú y la flora y la fauna de la fastera”.

Los ecoloxistes recuerden amás que yá denunciaron estos vertidos de la fábrica Agar de Asturias S.L qu’acaben nel ríu Calabres y na ría de Niembru énte la Confederación Hidográfica y la Conseyería de Mediu Ambiente. Anguaño, por mor de la continuidá de los fechos, recurren al fiscal y nagüen por que s’obligue “a la empresa a que pa furrular tien que tener la depuradora en marcha y tratando les aguas residuales que xenera”.