Ecoloxistes alerten de “amenaces” sobre la Cordillera Cantábrica

|

El 11 d’avientu ye’l Día Internacional de les Montañes. Coincidiendo con esta fecha, la Coordinadora Ecoloxista d’Asturies fai una “llamada d’alerta” de toles “amenaces” qu’hai sobre la Cordillera Cantábrica asturiana.

“Tanto la Cordillera Cantábrica como les sierres menores, suponen la columa vertebral de la nuesa historia, cultura y paisaxe”, señalen los coloxistes que recuerden “les decenes de proyectos de destrucción que tán pasando nes árees de montaña”.

Pa la Coordinadora Ecoloxista, son les “grandes infraestructures” les que suponen la mayor “amenaza” pa la montaña asturiana. D’esta miente, señalen proyectos como l’autovía dende Cangas de Narcea hasta Ponferrada o’l corredor ferroviariu del Güerna.

Mines a cielo abiertu, como les de Belmonte, Degaña y Tinéu; embalses “estúpidos” como’l de Caliao los del Altu Navia; y les llínies d’alta tensión de Soto-Penagos y Lada-Velilla; son dalgunes de los infraestructures denunciaes polos ecoloxistes.

Dende la Coordinadora Ecoloxista d’Asturies tamién criticaron otros proyectos como los parques eólicos nel Occidente, los teleféricos propuestos por dalgunos Conceyos mineros y la urbanización de les árees rurales. D’esti últimu aspecto señalaron que “la lexislación en territorio y mediu ambiente ta ignorándose”.

Cordillera Cantábrica como un ‘too’
“De xemes en cuando espierta un proyectu de la UNESCO de declarar tola Cordillera Cantábrica reserva de la biosfera”, comenten los ecoloxistes valorando la tierra d’esti entornu natural.

Nesta llínia, encamienten al Gobiernu del Principáu a que promueva la visión de la Cordillera Cantábrica “como un too” pa evitar que “cada Conceyu declare’l so reinu de taifes particular na so fastera de la Cordillera y faiga con ella que-y pete”.

 

Contador Estadistiques