Echen abaxo un toru d'Osborne

Esti sábadu, un de los célebres anuncios del toru d'Osborne, vieyos reclamos propagandísticos protexíos pol ministeriu de cultura, amaneció tiráu en suelu a consecuencia d'un ataque. La víctima foi'l toru d'Osborne asitiáu en Tamón, cerca d'Avilés, que yá fuere oxetu d'otros ataques va tiempu, como cuando apaeció con pintes blanques de vaca enriba la pintura negro orixinal. Esta vegada, quien fueren los responsables del ataque tuvieron que facese con radiales y equipu en condiciones pa poder baltiar el mazacote de fierru que son estos xigantescos toros que llevanten 13e metros y pesen cerca de 4.000 kilos.

L'asuntu del Toru d'Osborne ta dando de que falar nos tableros d'anuncies d'Asturies.com y pon otra vuelta d'actualidá esti vieyu artículu de Carlos Lastra na revista "Asturies, memoria encesa d'un país" qu'edita la Fundación Belenos y que s'espublizó na sección de cultura d'Asturies.com. Nelli estúdiase como foi qu'estos anuncios d'una conocía casa de vinos y llicores, condergaos a desapaecer por una llei que regulaba la propaganda en carreteres, acabaron por convertise en parte del patrimoniu cultural gracies al trabayu interesáu d'una organización pantasma que tampoco nun tuvo mayor problema n'achaplar el símbolu de los ganaderos asturianos pa quitase de competencia.

De la que se declararon Bien d'Interés Cultural nel añu 94, quedaben en tol estáu unos 92 toros d'Osborne, pero l'acción de grupos malcontentos col caltenimientu d'esti anunciu, que-yos abulta una manifestación del españolismu más ranciu, arriendes de propaganda encubierto de la casa Osborne (que sigue teniéndolu de símbolu), llevó yá a la destrucción de dellos toros, como en Cataluña, onde l'últimu toru qu'aguantaba nel pueblu d'El Bruc cayó esti añu na véspora del día de la hispanidá. En Cataluña la Lliga Anticolonial tamién e fizo contra'l toru una campaña abondo simpática, que, ensin falta de sierres, pretende llantar gatos en cuenta de los toros aprovechando'l simbolismu del gatu, que se diz igual que la contracción de Cataluña "CAT". Más información visitando'l web de la Lliga