Echa andar la estaya de llingua d'Avilés

El Conceyu d'Avilés presentó ayeri la "Estaya Llingüística y de Cultura Tradicional Asturiana" (ELLiCTA), una dependencia del Serviciu de Promoción Cultural de la Conceyalía de Cultura.

Dirixida pol filólogu Cesáreo García, esta estaya, a la par que va funcionar como oficina de normalización llingüística similar a otres siete oficines que yá trabayen n'otros conceyos d'Asturies pola promoción de la llingua asturiana, quier ser un mediu d'espardimientu de la cultura popular asturiana en xeneral. Con ello enmárcase la llingua asturiana dientro del contestu al que pertenez, al ser un elementu significativu, pola so especificidá y representación identitaria, del acerbu cultural comunitariu d'Asturies.

La pretensión de la Estaya, según el so responsable, ye la d'apoyar les iniciatives cíviques que yá trabayen na contorna avilesina pola recuperación de la cultura tradicional asturiana y estimular l'actuación d'otres nueves, procurando asegurar un usu del asturianu que contribuya a la visibilidá y dignificación del idioma

Ente los oxetivos básicos d'esti nuevu serviciu Cesáreo García márcase'l d'aconceyar l'amparu de condiciones llingüístiques y culturales personales con espresiones de respetu pola diversidá cultural de la ciudadanía, amás d'estudiar y definir la realidá sociollingüística de los avilesinos pa ver d'actuar en consecuencia, un puntu palque posíblemente se-y encargue al sociólogu Francisco Llera Ramo una encuesta sociollingüística del conceyu asemeyada a la que fexo en Xixón. Facilitar la conocencia del patrimoniu y situación sociollingüística a tolos ciudadanos al través de cursos, esposiciones, alcuentros, conferencies, prestixar l'empléu del asturianu y estimulalu, tanto oralmente como por escrito, promover l'usu del asturianu nes instancies oficiales y nes rellaciones del ciudadanu cola alministración, recuperar la toponimia tradicional, collaborar na divulgación de la cultura popular asturiana acullá de les fronteres avilesines y nos contactos y intercambios con otres manifestaciones etnoculturales y informar al ciudadanu de los sos derechos llingüísticos, de la normativa llingüística y de los trámites precisos en cuestiones llingüístiques son los cometíos d'esta estaya acabante d'echar a andar

D'otra manera, aparte de la xera nel campu sociollingüísticu, que representa una innovación n'actuación municipal, la Estaya va cubrir dende agora les actividaes habituales que dende'l Conceyu d'Avilés se vinieron faciendo al rodiu de la cultura tradicional. Nesti sentíu, van siguir apoyándose los actos regulares que faen les asociaciones avilesines dedicaes al folclor asturiano y a la investigación etnográfica amás d'atender l'apaición de nueves iniciatives.

"La Nuestra Estaya", que ye'l nome alternativu (al llau de les sigles formales ELliCTA) que se-y propón a la ciudadanía pa denotar collaboración y cercanía, tien una oficina habilitada nel primer pisu de la Casa de la Cultura d'Avilés (plaza Domingo Álvarez Acebal, nel centru de la ciudá). "La nuestra estaya" tien una dirección de corréu electrónicu ellicta@yahoo.es y tamién un grupu de noticies http://es.groups.yahoo.com/group/ellicta/