Echa a andar el cursu básicu de la XDLA

|
Echa a andar el cursu básicu de la XDLA

Va ponese na sede nueva, na cai Cimavilla d'Uviéu, de la organización, que sigue sumando apoyos a la manifestación pola oficialidá del día 21, l'últimu'l de CC OO.

El Cursu Básicu de Llingua Asturiana que la Xunta pola Defensa de la Llingua Asturiana (XDLA) entama davezu n'Uviéu va comenzar esta tarde, a les 19.30 hores y va constar de 20 hores llectives repartíes ente los martes y xueves siguientes, dos per xornada. El so preciu ye de 30 euros y inclúi tolos materiales necesarios.

Toles persones interesaes puen apuntase llamando al númberu de teléfonu 679.650.998 o mandando un corréu electrónicu a la direción info@exunta.org. Les clases van impartise na sede nueva de la XDLA, entidá acreitada pola Conseyería d’Educación y Cultura pa la formación permanente del profesoráu, que ta asitiada nel númberu 15 (escalera A, Primeru C) de la cai Cimavilla d'Uviéu.

Sofitos a la convocatoria del 21-A

De manera paralela, la organización cívica sigue trabayando en sumar apoyos a la manifestación pola oficialidá del asturianu y gallego-asturiano prevista pal sábadu 21, con salida al meudía de la Estación del Norte (RENFE) d'Uviéu. El sindicatu Comisiones Obreres (CC OO) amosó'l so sofitu a la convocatoria con una semeya na que tán presentes el so secretariu xeneral, José Manuel Zapico; Juan Pedro Muñoz, secretariu xeneral de CC OO Uviéu; Úrsula Szlata, del Área d'Emplegu y Formación; y Marta Mori, d'Enseñanza CC OO.

Contador Estadistiques