Echa a andar el 43 Festival de Cine de Xixón

19 películes entren na sección oficial, mientres qu'ente los ciclos paralelos rescampla'l dedicáu al nuevu cine italianu. Ente les producciones asturianes, Ramón Lluis Bande va presentar el so documental sobre la figura del militante comunista Horacio Fernández Inguanzo

El cómicu Javier Cansado y la periodista Sol Alonso son los encargaos a les 8 d'esta tarde de despesllar en Teatru Xovellanos el telón de la 43 edición del Festival Internacional de Cine de Xixón, que va desrrollase n'ocho sales de la ciudá dende güei hasta'l 2 d'avientu.

19 son les películes que van entrar a la sección oficial, 14 d'elles a concursu, anque nel certame nel so conxuntu van proyectase más de 150 títulos estremaos 14 secciones y ciclos, y ello ye qu'esti añu, amás de les dos estayes competitives, la Sección Oficial, con llargos y curtios a concursu, y Enfants Terribles, de cine pa neños y xente mozo, programa tamién los ciclos Desorde y Conciertu, sobre documentales musicales, Llendes, estaya dedicada a les películes esperimentales y nel llímite ente la ficción y la realidá y la estaya "Nuevos Cines" onde esti añu va facese una retrospectiva bien grande al Nuevu Cine Italianu que garró'l relevu del neorrealismu de posguerra de los 50 cola llegada de realizadores nuevos, munchos d'ellos dende'l campu de la televisión, casu d'Ermano Olmi . Esbilla ye otru de los tradicionales ciclos paralelos del festival, recoyendo títulos de ficción y documentales que nun concasen colos temes de los demás ciclos pero que llamaron l'atención de los responsables del certame pola so calidá y orixinalidá y que, d'otra manera, nunca nun diben vese nes nuestres pantalles comerciales. Los tradicionales homenaxes que tolos años suelen dedicáse-yos a directores van ser nesta 43 edición pa la francesa Claire Denis, una de les meyores, y con ello más desconocida, de les directores del cine européu contemporaneu, pal independiente americanu Todd Solondz, autor de la famosa "Happines" y del que va estrenase en primicia'l so últimu llargu "Palindromes" y pal finlandés Pirja Honkasalo.

No tocante a la representación asturiana, el festival va proyectar 16 títulos del país de los temes má variaos. Seyes d'ellos van facelo na estaya fuera de competición, ente ellos "The last picture show" títulu garráu por Pablo Quiroga de la película de Bogdanovich pa espeyar la última sesión de los multicines de la carretera de la costa de Xixón hasta "Mar de Valientes" documental que recrea la galerna qu'azotó a los marineros de Llastres nel añu 1944. Xunta ellos, el Día d'Asturies acuta tamién sitiu pa otros nueve títulos a competición. Otramiente, l'asturianu Ramón Lluis Bande presenta nel ciclu "llendes" el so documental sobre la figura del históricu militante comunista Horacio Fernández Inguanzo.
Más información na web del Festival de Cine de Xixón