Easyjet refuga entamar la llinia ente Asturies y Berlín

La Conseyera de Cultura y Turismu Ana Rosa Migoya dio anuncia ayeri de que la empresa de vuelos baratos Easy Jet refugó entamar el serviciu cola capital alemana. En resultes d'ello, l'executivu asturianu ta agora en tratos cola empresa Air Asturias pa qu'abra media docena de destinos nuevos coles ciudaes de Roma, Milán, Lisboa, Amsterdam, Francfort y la mesma Berlín.


La conseyera Migoya dio estes esplicaciones na so comparecencia a petición del PP na Comisión de Cultura de la Xunta Xeneral del Principáu, ello dempués de que la mesma Migoya anunciare que se-y diere a la empresa inglesa d'aviación un ultimatum de diez díes pa que comunicare si tenía o non intención d'entamar la llinia con Berlín como taba apautada. L'añu pasáu, Easy Jet entamó a operar dende Ranón col Aeropuertu de Londres Stansted dempués de que se llegare a un alcuerdu col Gobiernu asturianu, que-y paga a l'aerollinia 576.000 euros en conceptu de publicidá turística d'Asturies nel Reinu Uníu, anque la Conseyera diz que d'esa cantidá va descontase la parte proporcional de los díes en que se suspendieron vuelos. L'alcuerdu incluyía la creación d'una llinia con Berlín qu'a la fin nun va cumplise. Ana Rosa Migoya aclarió que la empresa xustificó la so decisión por "razones comerciales" pero que sigue abierta a abrir llinies con otros destinos europeos si tener tienen aceptación comercial.


Pa sustituyir a Easy Jet na llinia de Berlín el Gobiernu ta agora negociando cola compañía aerea de capital asturianu Air Asturias, que quier echar a andar nel mes de xunetu. Otramiente, Asturies tien alcuerdos con Air Nostrum pa vuelos con París y Bruseles.

Los representantes del PP acusaron al Gobiernu de nun valorar nel so día la ufierta de la compañía Ryan Air, que ye la mayor competidora d'Easy Jet.