easyJet abandona l’Aeropuertu d’Asturies na temporada d’iviernu

|
Airbus A-319 d'easyJet

L’aerollinia británica easyJet va dexar de volar dende Asturies el 28 d’ochobre, cuando va abrise la temporada d’iviernu d’aviación comercial. Esta compañía lleva establecida nel aeropuertu dende l'añu 2004, con rutes a Genèva en branu y a Londres, tol añu.

La puesta a la venta de los billetes pa esta época del añu desatapaba la decisión d’easyJet, al nun apaecer Asturies como llugar de destín o salida. Poco depués l’aerollinia confirmaba que nun diba a caltener la ruta al aeropuertu londinense de Stansted n’iviernu, ensin descartar la posibilidá de retomala en branu del 2019.

Anguaño easyJet compite na mesma ruta con Vueling y la compañía de baxu costu d’Iberia, Iberia Express, que viaxen a los aeródromos londinense de Gatwick y Heathrow, de manera respeutiva. Dambes compañíes tán subvecionaes pol Gobiernu, motivu que podría ser el motivu de la decisión de l’aerollinia británica, pero tampoco ye segura la continuidá de dambes n’iviernu, yá que finen contratu y tampoco nun tán vendiendo billetes pa eses feches.

Los perxudicaos por esta decisión son los viaxeros, que presumiblemente sufrirán una xuba del preciu de los pasaxes al haber una menor competencia. El Reinu Xuníu ye ún de los estaos con mayor presencia d’emigración moza asturiana y los vuelos ente Asturies y la capital británica suelen dir enllenos.

Semeya obra d'Anna Zvereva baxo llicencia CC BY-SA 2.0.

Contador Estadistiques