EAJ-PNV y el PSE alcuerden una reforma del estatutu vascu

Los nacionalistes apóyense pa gobernar nos socialistes, que van llevar trés conseyeríes.

El pautu de Gobiernu ente l'EAJ-PNV y el PSE, entituláu 'Más y más autonomía', tien como aspeutu más destacáu una reforma del estatutu d'autonomía, siempre dientro de la llegalidá vixente. Nun plazu d'ocho meses va ellaborase un borrador y va tramitase nel Eusko Legebiltzarra como proposición de llei.

Dambes formaciones comprométense a buscar el mayor consensu posible, col reconocimientu d'Euskadi como nación y el derechu a decidir sobre la mesa. Tres celebrar les ponencies sobre l'autogobiernu nel Parllamentu, definir el testu y aprobalu, va sometese a referendum enantes de llevalu al Congresu.

Col apoyu del PSE, Iñigo Urkullu va siguir como lehendakari. L'EAJ-PNV nun buscó l'apoyu d'EH Bildu, segunda fuercia, y apostó polos socialistes, terceros más votaos nes eleiciones de setiembre, qu'entren nel Gobiernu coles conseyeríes de Vivienda, Turismu y Trabayu.

Ensin conocimientu del pautu en Madrid

La negociación entes les dos formaciones fíxose ensin conocimientu de la xestora del PSOE liderada pol presidente d'Asturies y secretariu xeneral de la FSA, Javier Fernández. La secretaria xeneral del PSE, Idoia Mendia, namái informó a Madrid del conteníu del mesmu cuando ésti taba zarráu. Hasta esi momentu treslladara namás les llinies xenerales del alcuerdu.

Ye importante destacar que Mendia yera ún de los apoyos de Pedro Sánchez, el dimitíu secretariu xeneral del PSOE.