Dupont vende

La multinacional química Du Pont de Nemours va vender la so división de testiles, que queda esgayada del restu la empresa. Esta división ye la que trabaya tres de los productos más de bandera de la casa yanqui: el nylon, la lycra y el poliester, y nella ta enxertada una de les fábriques que la casa americana tien en Tamón, concretamente la que produz el tetrahidrofurano que s'emplega na fabricación de la licra.La división de testiles vendió per importe de 6.500 millones de dólares l'añu pasáu, cásique la cuarta parte del volume total de la compañía, anque tres la reorganización que se fizo en Du pont yá venía funcionando d'un tiempu p'acá como compañía independiente. Les otres cuatro divisiones de Du pont son Electronic&Communication Technologies (material electrónico), Performance Materials (polímeros y resines), Coatings&Color Technologies (pintures), Safety&Protection (fibres protectores) y Agriculture&Nutrition (biotecnoloxía).Du Pont llegó a Asturies en 1989. Con tol sofitu institucional, la planta de Tamón presentóse énte la sociedá asturiana como una inversión clave pa salir de la crisis, anque anguaño nun ufierta la cantidá de puestos trabayu que prometió de la que vieno. Otramiente, Du Pont ta siempres nel oxetivu de los grupos ecoloxistes. Anque la empresa presenta la protección del mediu ambiente como ún de los sos oxetivos y tien convertía la planta de Tamón nun parque natural, lo cierto ye que dellos de los sos productos lleven arreyaos bien de riesgos mediuambientales.