Dupont tranca la planta asturiana de THF

La multinacional americana Dupont de Nemours va trancar definitivamente la planta de producción de Tetrahidrofurano (THF) una de les cuatro que tien la empresa nel valle de Tamón (Carreño)

La fábrica foi de les primeres qu'echaron a andar nel complexu asturianu de la multinacional química, y supunxo nel añu 93 una inversión de cerca de 200 millones d'euros, pero nunca nun tuvo un andar curiosu. La falta de productividá y de competitividá foron los argumentos que sacó la empresa cuando va agora dos años decidió vender Invista, nome baxo'l que trabaya tola estaya mundial de testiles de la compañía, un determín que se sabía qu'acabaría afectando a la planta asturiana de THF.

El 12 de febreru del 2002, Dupont decidió vender tola estaya de testiles, que quedó esgayada del restu la empresa. Esta división yera la que trabayaba trés de los productos más de bandera de la casa yanqui: el nylon, la lycra y el poliester, y nella taba enxerta una de les fábriques que la casa americana tien en Tamón, concretamente la que produz el tetrahidrofurano que s'emplega na fabricación de la lycra. La división de testiles vendiere l'añu enantes de vendela per importe de 6.500 millones de dólares, cerca de la cuarta parte del volume total de la compañía, anque tres la reorganización que se fizo en Dupont yá funcionaba d'un tiempu p'acá como compañía independiente. Les otres cuatro divisiones de Dupont que siguen dientro de la casa son Electronic&Communication Technologies (material electrónico), Performance Materials (polímeros y resines), Coatings&Color Technologies (pintures), Safety&Protection (fibres protectores) y Agriculture&Nutrition (biotecnoloxía)

A la fin, foi la empresa Koch Industries la qu' acabó mercando'l pasáu 30 d'abril la estaya de testiles de la Dupont por un importe de 4.400 millones de dólares. Na reestructuración d'Invista tres de la vienda la planta de Tamón sobra, y ello ye que tecnolóxicamente siempres foi enforma abegosu'l funcionamientu de la mesma. Tamón yera la segunda planta mundial en fabricación de THF, una freba que se saca de la oxidación del butanu per aciu d'una tecnoloxía enforma complicada y cara que comprometió la rentabilidá de la planta dende qu'echó a andar

La planta de THF de Tamón tien una plantiya de más de mediu centenar de trabayadores, que se diz dende Dupont que van recolocase n'otres instalaciones de la empresa n'Asturies, anque esisten duldes sobreesi compromisu. Otramiente, alredor de Dupont abeyen más de venti empreses que tienen nes subcontrates del complexu industrial de Carreño una importante fonte d'ingresos y a les qu'esti pieslle pue dañar enforma.

DuPont llegó a Asturies en 1990 y tien, amás de la planta de THF, otres trés que producen la freba ignífuga nómex, la tela de protección sontara y productos fitosanitarios. Ello xunta tres centros de servicios: l'informáticu, que xestiona parte de los sistemes d'información mundiales de la compañía, y los centros europeos de finances y recursos humanos.