Duerna va presentar en Sama el so videoclip ‘Fiestes de prau’

El Cine Felgueroso de Sama va acoyer esti vienres la presentación del videoclip de Duerna ‘Fiestes de prau’, el primeru nos sos trés años d’historia. Esti cantar forma parte del discu ‘Manca la maera’, que va salir en pocos díes al mercáu.
 
El videoclip ‘Fiestes de prau’ grabóse nel mes d’abril nel campu de los cuarteles La Formiguera, en La Felguera, que convirtióse nuna romería asturiana pa la ocasión. Señor Paraguas Artes Audiovisuales encargóse de la grabación del vidiu d’esti cantar compuestu por Tante Blanco y iguáu pol grupu, que muestra escenes típiques d’esti tipu de folixes. La proyeición del trabayu nel Felgueroso, con entrada de baldre, ta prevista pa les 19.30 hores y va contar cola presencia d’Esther Díaz, alcaldesa de Llangréu; el músicu Tante Blanco; y representantes d’Algamar Producciones y Señor Paraguas.
 
Díes depués, va salir al mercáu’l primer discu del grupu de la cuenca’l Nalón, que de momento namái tenía espublizada la maqueta ‘Dende’l chigre’. El nome d’esti trabayu nuevu ye ‘Manca la maera’ y la so presentación oficial va tener llugar nes fiestes de Santiago, de Sama, el 24 de xunetu, una cita na que van participar agrupaciones de la zona y tolos collaboradores del álbum. Mentes, pa finales d’añu, Duerna tien previsto entrar otra vegada nel estudiu de grabación pa trabayar n’otru discu, nesti casu el que-y correspuende como premiu por ganar el VI Concurso Escenario Prau qu’entama l’Asociación Cántabra de Festivales de Prau.