Duerna asoleya’l videoclip ‘Fiestes de prau’ y yá prepara’l conciertu presentación de ‘Manca la maera’

La banda folk de la cuenca’l Nalón Duerna yá dio a conocer el so vidiu ‘Fiestes de prau’, nel que se representa una romería asturiana. Esti tema ta dientro del discu ‘Manca la maera’ que va presentase’l 24 de xunetu nes fiestes de Santiago, de Sama.

 

El Cine Felgueroso d’esta población de Llangréu acoyó’l vienres pasáu la presentación d’esti videoclip grabáu el 24 d’abril nel campu de los cuarteles La Formiguera, en La Felguera, onde Duerna y Señor Paraguas Artes Audiovisuales, encargaos de la grabación, entamaron una romería que tal paez de verdá, yá que nun-y falta de nada: xente, sidra, comida, un escenariu, lluces y hasta volaores. La xente del conceyu respondió bien a la convocatoria pa la grabación del videoclip y tamién pa presenciar el so estrenu, yá que’l cine llangreanu enllenóse pa la ocasión.

 

Nun primer momentu, los presentes pudieron sentir dalgunos cantares del primer discu de Duerna, ‘Manca la maera’, que va salir a la venta alredor ente’l 6 y el 10 de xunetu, según confirmó Pablo Carrera, gaiteru de la banda que pon voz a ‘Fiestes de prau’, pa depués entamar coles intervenciones. Ana Oliva Rodríguez, conceyala de Cultura; Tante Blanco, músicu y compositor de ‘Fiestes de prau’; el realizador y responsable d’Algamar Produccciones, Pablo Quiroga; y los componentes de Duerna, foron les persones que tomaron la pallabra enantes de la proyeición d’un vidiu que prestó enforma a los siguidores de Duerna.

 

Tres asoleyar esti vidioclip, el primeru na historia del grupu, Duerna ta agora trabayando nel conciertu presentación de ‘Manca la maera’, previsto pa la madrugada del 24 al 25 de xunetu –que ye festivu en Llangréu–, yá que la hora d’aniciu de l’actuación va ser les 00.30 hores. Pa esta cita, la banda va axuntar en Sama a cuatro grupos de bailles, dos bandes de gaites y un coru, toos de la cuenca’l Nalón, amás de dellos músicos de la zona, como’l propiu Tante Blanco.