DRD presentó oficialmente'l so discu

La mañana lluviosa del xueves agospió la presentación oficial del primer discu del tríu DRD. Na presentación de Namái tuvieron presentes los miembros del grupu y el responsable de la casa de discos Fonoastur Lisardo Lombardía, qu'aprovecharon pa falar del discu y de la situación de la musica folk asturiana.

Los trés miembros del grupu -Diego Pangua, Dolfu Rodríguez y Rubén Bada- aprovecharon la ocasión primero de nada p'agradecer a tolos collaboradores del discu la so ayuda, Xosé Ambás, Fernando de la Puente y Naciu-i Riguilón apurriendo cantares, la gaita irlandesa de Jarlath Henderson o'l baxu de Sergio Rodríguez, amás de los conseyos llingüísticos de Fernando Álvarez-Balbuena pa iguar dalgunes lletres. La banda faló de los novedoso de la so formación, un tríu, "que ruempe un poco cola estructura clásica de grupu folk, que tien sobre siete miembros que suelen repartise la instrumentación de forma mui paecida", comentó Diego Pangua. El grupu considera que "ye más fácil entendese ente trés y d'esta manera podemos facer unos directos más flexibles, podemos variar más los cantares d'un conciertu a otru".

No que cinca a la cuestión estilística del grupu, Rubén Bada afirmó que "basámonos en temes tradicionales y composiciones a los que damos estructures y harmoníes nueves, que ye lo más característico de DRD". A partir d'ehí, los músicos y el productor Lisardo Lombardía pasaron a comentar la so visión de la escena folk asturiana. Diego Pangua afirmó que " nun toi d'alcuerdu lo que se diz en dalgunos sitios de que'l folk asturianu ta estancáu. Considero que tán afitándose un estilu, yá qu'a naide se-y ocurre dicir que'l pop o'l rock tean estancaos porque'l los grupos se paezan unos a otros, asina que nun me paez que teamos viviendo una crisis nel folk asturianu, más bien tolo contrario", palabres coles que tuvieron d'alcuerdo'l restu de la mesa que participaba na presentación d'esti Namái de DRD.