Más de doscientos figurantes van dar vida al Festival Astur-Romanu de Carabanzo

Los romanos avérense a La Carisa y los ástures prepárense pa defender el territoriu. El domingu esperen la batalla, pero enantes queda muncha folixa per delantre, cola Nueche Astur del sábadu como platu fuerte gracies a la presencia de Dixebra, Skanda y Spanta la Xente. Ye’l Festival Astur-Romanu de Carabanzo, qu’esti añu va contar con récor de figurantes.

Añu tres añu, y yá van nueve, esta orixinal celebración nun para de medrar, como amuesen les 3.500 persones que s’averaron l’agostu pasáu al prau asitiáu na parte alta del pueblu ḷḷenizu pa ver la llucha ente ástures y romanos. Ye l’actividá más multitudinaria de la folixa, anque la Nueche Astur del sábadu (23 hores) nun se queda atrás. Nesta ocasión los grupos participantes son los llocales Spanta la Xente, los mierenses Skanda y los avilesinos Dixebra. Una folixa cola que los ástures prepararán la batalla final y qu’allargará DJ Nacho Otero hasta bien entrada la madrugada.

El IX Festival Astur-Romanu va dar aniciu’l vienres a les 11 hores cola apertura del tabernarium y l’entamu d’una romería astur. Yá cola llegada de la escuridá, a les 23 hores, va tener llugar la ‘Nueche del Truenu’, ceremonia cola que la xente mozo ástur va preparáse pa ser guerreru; un llabor nel que van collaborar Talbot, DJ K12 y DJ Mallada. El sábadu ye’l día de la ‘Congregación de les tribus’, con actividá nel pobláu ástur a partir del meudía. Pa les 13 hores ta previsto’l pautu ente los caudiellos de les tribus ástures y, media hora más tarde, el pasucais de los guerreros. Yá de tarde, a les 17 hores, van dar aniciu los IX Xuegos Ástures de La Carisa, a lo que va siguir un rellatu de lleendes (19 hores) y la novedá d’esti añu, la Executio (21 hores), cola execución d’un un líder ástur a manos d’un romanu. Darréu, a les 22 hores, va tener lllugar l’entierru d’esti home, la proclamación d’un caudiellu nuevu y la invocación de venganza por parte de la guerrera Imborg. El rock astur va sirvir, darréu, pa dar fuercia a los lluchadores.

El domingu, día de la batalla final, va inaugurase la villa romana a les 12.30 hores, tando’l desfile de los lexonarios pel pueblu previstu pa les 13.35 hores. A esa hora yá van tar los ástures xuníos preparaos pa la llucha, prevista pa les 14 hores no alto del pueblu. De toos ye sabío la derrota asturiana, polo que la tarde va tar dedicada a los rituales romanos de la victoria. Ente estes actividaes destaca, a les 17 hores, una charra de l’Asociación Trebas Galaicas sobre la indumentaria, los preseos y armes de los soldaos de dambos bandos.

Pa disfrutar de la fiesta, la organización pon autocares de baldre nuecherniegos a La Pola Ḷḷena, Uxo y Mieres el vienres y el sábadu, asina como’l domingu pa presenciar la batalla, con horarios que se pueden consultar nel Facebook de la organización. Otra manera, los responsables del Festival Astur-Romanu conviden a toles persones a dir a Carabanzo carauterizaes, yá sían d’ástur o de romanu.

Videoxuegu de la batalla

El Conciyu Ḷḷena, col oxetivu de promocionar Vía Carisa y el Festival Astur-Romanu de Carabanzo, ta acabante de presentar un videoxuegu sobre la llucha nel llugar ente ástures y romanos. Ésti, programáu por Simar Informática con una inversión de 5.000 euros, lleva’l nome de ‘Carabanzo Battle’ y pue xugase pela rede al traviés d’esti enllaz. Una bona forma de da-y la vuelta a la historia.