Dos volumes analicen la obra y la vida de Mánfer de la Llera

La Casa de los Alberti, en Ciañu, acoyó esti xueves la presentación de dos volumes nuevos sobre Mánfer de la Llera nel marcu de la Selmana de les Lletres Asturianes. Los dos llibros analicen la obra lliteraria y la vida del escritor llangreanu.
 
El primer d’ellos lleva’l títulu de ‘Mánfer de la Llera, de la rampla a la pluma’ y consiste nun volume divulgativu que recueye artículos sobre la biografía de Manuel d’Andrés Fernández, del contestu históricu llangreanu, de la so vida como militante nos barrios de Xixón y d'otres curiosidaes del artista. El nome del llibru fai un guiñu a ‘Del aráu a la pluma’, antoloxía lliteraria asturiana editada na época del primer surdimientu, sostituyendo la rampla minera, pol aráu agrícola. Collaboren nesta obra, ente otros, Armando Magadán, encargáu de la biografía; Aladino Fernández , que fala del Llangréu de la época; el periodista Paco Álvarez, que recuerda a Mánfer como militante de barriu en Xixón; y Inaciu Llope, que fai un análisis sobre la doble transición.
 
Ún de los apartaos más emblemáticos del volume ye'l d'Irene Díaz, que fala del movimientu pensionista, del que Mánfer de la Llera foi parte mui activa. Asina, inclúise un artículu de Jesús Menéndez Peláez, profesor y antiguu cura que nel 1971 taba destináu de manera temporal na ilesia de San José, en Xixón, na que Manuel y otros 80 pensionistes de la Comisión Provincial de Pensionistes d'Asturies fixeron un enzarru reivindicativu. La Policía franquista reprimió duro a les persones que taben na ilesia y munchos d'ellos foron a xuiciu. Nel procesu, el párrocu Peláez declaró como testigu en favor de los acusaos, pese a lo que nun pudo evitar algunes condenes. Sicasí, el so xestu valió-y l'agradecimientu del escritor asturianu.
 
El segundu volume, 'En cata de la mio lluna', tituláu como un versu del autor, ye una antoloxía lliteraria seleicionada por Severino Antuña, que s'emocionó pol fechu de que les instituciones dieren la cara por un escritor autodidacta y fíu de la minería. El llibru recueye poesía y prosa de Mánfer, con poemes como ‘Xubiláu’, ‘Mira a ver tu, poeta’, ‘El bable’, ‘Asturies eterna’, ‘Acabación’ –que lleó Vicente Álvarez Areces el miércoles na Xunta Xeneral– o ‘Soledá’. Tamién s'inclúin cuentos como ‘Nueche avegosa’ o cróniques como ‘El día qu'estalló la revolución’, amás de los llamaos testos paralelos, que Manuel componía como poemes y depués tornaba en narraciones prosaiques.
 
Na presentación d’estos dos trabayos tuvieron presentes los coordinadores de los volumes editaos, los investigadores y espertos lliterarios Luis Casteleiro y Severino Antuña; la direutora xeneral de Política Llingüística, Consuelo Vega; la teniente d'alcalde de Llangréu, María Fernández; y el responsable d'Ámbitu, entidá propietaria de la editorial Trabe, Inaciu Iglesias. Tampoco faltaron a la cita los fíos del autor, Vital, Efrén y Ramón d'Andrés.