Dos programes sobre salú pública son reconocíos pol Ministeriu de Sanidá

El Gobiernu estatal inclúilos nel Catálogu de Bones Práutiques al valorar la so promoción de vezos y conductes saludables.

'Ni ogros ni princesas' y la 'Encuesta de salud infantil en población gitana' son los dos programes que son reconocíos pol Ministeriu de Sanidá, Consumu y Bienestar Social. El primeru ye un programa d'educación afeutivo-sexual, desenvueltu a comuña por profesionales de los ámbitos sanitariu y educativu, y empobináu a estudiantes de 12 a 16 años d'Educación Secundaria Obligatoria (ESO).

El profesoráu imparte les sesiones y los talleres de refuerciu tán al cargu de profesionales sanitarios y persones espertes d'otres entidaes como Conseyu de la Mocedá del Principáu d'Asturies o les asociaciones Astursex y Xega. Dende que s’implantó nel 2008 participaron más de 20.000 alumnos y alumnes y formáronse más de 500 docentes, impartiéndos nel 60 por cientu de los centros educativos públicos de secundaria.

Metodoloxía novedosa

Pela so parte, la 'Encuesta de salud infantil en población gitana' ye una actividá pionera nel Estáu. El so oxetivu ye conocer y monitorizar la salú nesti colectivu, asina como los vezos o estilos de vida y l'usu de los servicios sanitarios, que dexe aportar información relevante pa la priorización d'intervenciones de meyora y promoción de la salú na comunidá xitana asturiana.

El programa aplica una metodoloxía novedosa, yá que la encuesta faenla miembros de la mesma comunidá xitana, primeramente formaos pa ello. Trátase de llograr un acercamientu más fidedignu a la realidá y, a partir de les resultancies llograes, pónense en marcha actuaciones naquellos campos qu'apaecen como más relevantes, como pueden ser el tabaquismu o l'alimentación, ente otros.

Con esta incorporación al Catálogu de Bones Práutiques del ministeriu valórase l'esfuerciu fechu pa cumplir colos oxetivos y encamientos de la Estrategia de Promoción de la Salud y Prevención en el Sistema Nacional de Salud (SNS), asina como la incorporación d'un enfoque innovador que contribúi a ameyorar la calidá de les intervenciones en promoción de la salú y prevención a tolos niveles.