Dos documentales súmense a les celebraciones de los centenarios de Cuadonga

La TPA va emitir enantes de que fine l’añu’l documental ‘El parque humano’, dirixíu por Tom Fernández, sobre Picos. La cinta ye una iniciativa más del programa ‘Centenarios Cuadonga’ entamáu dende’l Gobiernu pa celebrar esta triple efeméride y a ella va sumase una segunda sobre los oríxenes de la monarquía asturiana.

‘El parque humano’ amuesa la riqueza y diversidá medioambiental del espaciu protexíu nacíu nel 1918 baxo’l nome de Parque nacional de la Montaña de Covadonga, el primer del Estáu, amás de numberosos testimonios de los habitantes que lu pueblen y contribuyeron a modelar el so paisaxe. “Trátase d’una producción que nos avera a la espectucularidá d’un parque nacional centenariu al traviés d’imáxenes d’alta definición y calidá cinematográfiques captaes en diferentes estaciones del añu, dende perspeutives poco conocíes y con planos inéditos mediante l’usu de drones”, pronunció Guilermo Martínez Suárez.

El conseyeru de Presidencia y Participación Ciudadana tuvo acompañáu na presentación de la promo de la producción pol so direutor; el titular d’Infraestructures, Ordenación del Territoriu y Mediu Ambiente, Fernando Lastra; y el direutor xeneral de RTPA, Antonio Virgili, amás de pola direutora de Rellaciones Institucionales y Comunicación de Liberbank, Ana Echenique, y la direutora executiva de la Fundación EDP, Vanda da Veiga, empreses patrocinadores principales de los centenarios de Cuadonga. Nun va ser l’únicu documental que se faiga al respeuto, yá que Martínez Suárez anunció un segundu “sobre los oríxenes de la monarquía asturiana” que tamién va emitir TPA.

Na semeya, Fernández, Lastra, Echenique, Virgili y Martínez Suárez.