Dos conceyos lleoneses piden amestase al Bierzu

Los conceyos de Palacios del Sil, que pertenez a L.laciana, y el de Trueitas (oficialmente "Truchas"), inxertu xeográficamente na Cabreira, pidieron formalmente amestase a la Comarca del Bierzu, entidá qu'axunta hasta agora a 37 conceyos lleoneses y que ye la única de les sos característiques en Lleón.

Dase la circunstancia de que dambos conceyos son dos de los que meyor caltienen la llingua asturiana a la otra parte del cordal. Asina ye nel casu de Palacios del Sil, conceyu natal del escritor y Académicu de la Llingua Asturiana Roberto González Quevedo, que fixo la so tesis doctoral sobre la fala del llugar y que ta pa convertise nel conceyu númberu 38 de la Comarca del Bierzu, un pasu que podría dase nos primeros meses del 2006.

El Presidente del Conseyu Comarcal del Bierzu Ricardo González Saavedra y l'alcalde de Palacios del Sil Orlando López aconceyaron esti llunes pa tratar d'esta yá más que posible entrada del conceyu na Comarca, una entrada que-y va permitir a Palacios, en palabres del so alcalde "francer l'aislamientu institucional" y acceder a bien de servicios y ventayes qu'ufierta la Comarca, entidá de rangu superior a la mancomunidá.


Tres de Palacios del Sil, el númberu 39 na llista de la Comarca del Bierzu podría ser el conceyu asturfalante de Trueitas, que ye parte de La Cabreira, que tamién lo tien solicitao. Con too y con ello, la entrada d'estos conceyos a la entidá berciana nun pue dase por fecha, y esiste un debate políticu dientro de la comunidá autónoma de Castiella y Lleón sobre les implicaciones llegales que van arreyaes a la entrada nun órganu de conceyos de dos miembros que xeográficamente nun pertenecen a la comarca.


El Bierzu, ta estremáu llingüísticamente ente los dominios gallegu y asturianu anque la llingua gallega tien cierta presencia institucional, enséñase nes escueles y reivindícase por dellos sectores como seña d'identidá comarcal.