Dos conceyales de la CUP participen nunes xornaes sobre esti proyeutu soberanista d'izquierda catalán

Conceyu Abiertu entama esta fin de selmana unes xornaes n’Uviéu y Xixón entitulaes ‘Soberanismu d’izquierda y trabayu municipalista: la esperiencia de la CUP”. Pa ello convidaron a dos conceyales de Vilanova i la Geltrú d'esta organización.

 

En concreto desplazáronse a Asturies Raimon Ràfols y Marc Font, ediles d’esti municipiu barcelonés de 66.000 habitantes gobernáu por CiU nel que la CUP cuenta con trés representantes tres sumar el 10,39 por cientu de los votos nes municipales del 2011. La Candidatura d’Unitat Popular (CUP) trátase d’una organización política asamblearia basada nel trabayu dende’l municipiu que furrula con ésitu en delles poblaciones de Catalunya y que nel 2012 decidió dar el saltu y presentase a les eleiciones a la Generalitat, consiguiendo 3 diputaos. Esta esperiencia tuvo influencia nel nacimientu de Conceyu Abiertu n’Asturies nel 2011 de cara a les municipales, algamando un conceyal en Noreña.

 

Precisamente esti edil, Pablo Pérez, va acompañar a Ràfols y Font na primer sesión de les xornaes, que va tener llugar esta tarde nel llocal de la Corriente Sindical d’Izquierda (CSI) n’Uviéu (Hermanos Menéndez Pidal, 14) por mor del desallugu del CSOA La Madreña. La charra va principiar a les 20 hores, pa depués celebrar una espicha nel mesmu llugar. Mentes, mañana, les actividaes van treslladase a Xixón, en concretro al Centru Social Sestaferia (Joaquín Alonso Bonet, 3), onde los conceyales catalanes van repetir ponencia, nesta ocasión xunto con Mariu Arbesú, coordinador nacional de Conceyu Abiertu. Tres l’actu, que va dar comienzu a les 12.30 hores, va entamase una xinta popular (por motivos d’espaciu les places tan llendaes, polo qu’hai qu’acutar nel teléfonu 605.386.930).

 

Dende la plataforma d’eleutores asturiana indiquen qu’estes xornaes “d’alderique, reflexón y xuntanza popular” tienen l’envís “de deprender de les esperiencies soberanistes de países como'l catalán”. D’igual forma, sirven p’afitar les bones rellaciones ente les dos organizaciones, qu’aconceyaron el 6 de febreru en Barcelona pa falar de les Europees y intercambiar información sobre l’actualidá política y social de los dos países. Finalmente, tanto la CUP como Conceyu Abiertu refugaron n’asamblea participar nes eleiciones al Parllamentu Européu.