Dos centenares d'espertos nel enseñu de llingües participen nun congresu internacional n'Uviéu

La cita entámala la Sociedad Española de Didáctica de la Lengua y la Literatura (SEDLL) baxo'l nome 'Educación llingüística y lliteraria integral, anovación y proyeutos de centru'.

Esta mañana arrancó na Facultá de Formación del Profesoráu y Educación de la Universidá d'Uviéu el XXIII Congresu Internacional de la SEDLL, que se va allargar per trés díes nos que "un total de 200 espertos en Didáutica de les Llingües d'universidaes españoles, iberoamericanes y europees van esponer los sos puntos de vista acerca del tratamientu escolar qu'han tener, respeutivamente, la llingua estatal, la estranxera y, nel so casu, la llingua rexonal". A les 11.30 hores celebróse la inauguración cola presencia de la conseyera d'Educación, Lydia Espina; el presidente de la SEDLL, Josep Ballester; Marcelino Fernández-Raigoso, en representación de la Universidá d'Uviéu; y el presidente de l'Academia de la Llingua Asturiana, Xosé Antón González Riaño, qu'actúa como presidente del Comité Organizador.

El lema central de les xornaes, el billingüe 'Educación llingüística y lliteraria integral, anovación y proyeutos de centru', afonda nuna temática "especialmente oportuna nos momentos nos que la llei educativa nueva, la LOMLOE, ponse en práutica nes etapes d'Educación Infantil, Primaria y Secundaria". Delles de les intervenciones van centrase na llingua asturiana, como les comunicaciones 'Usu de les tertulies lliteraries dialóxiques pal enseñu del asturianu. Perspectives y percepciones del profesoráu', de Xandru Armesto y María Pilar Fernández González; 'El Prácticum de la Mención de Llingua Asturiana: un primer averamientu a la visión de los sos protagonistes', de Roberto Avello-Rodríguez y Alberto Fernández Costales; o 'Un modelu de PLC pa una llingua non oficial dientro de les llendes de la LOMLOE', de José Luis Remis.

Esti congresu cuenta cola collaboración tanto Facultá de Formación del Profesoráu y Educación como del Departamentu de Ciencies de la Educación. Calcando equí pue consultar el programa completu del congresu.

Na semeya González Riaño, Ballester, Espina y Fernández-Raigoso na inauguración del congresu.