Donostia, Capital Europea de la Cultura 2016 xunto a Wrocław

Manfred Gaulhofer, presidente del Comité de Seleición de la Capital Europea de la Cultura 2016, anunció que Donostia va llucir esti títulu nesi añu. Asturies tamién aspiraba al gallardón, pero quedó fuera de primeres por una planificación mala.
 
Según esplicó Gaulhofer, Donostia “tien claru'l compromisu cola cultura pa contrarrestar la so dura historia de violencia. El xuráu entendió qu'hai una espectativa clara de que la ciudá que represente a la cultura pueda contribuyir a frenar la violencia nel País Vascu”. Pal presidente del Comité de Seleición, la capital de Gipuzkoa tien delantre “una oportunidá pa fortalecer el compromisu social polos derechos humanos y la rebeldía cívica contra cualquier forma d’esclusión y de violencia”.
 
Burgos, Córdoba, Donostia, Segovia, Las Palmas y Zaragoza foron les ciudaes del Estáu que pasaron tolos cortes hasta llegar a la fase última del procesu de seleición. Asturies tamién aspiraba a algamar el títulu de capital europea de la cultura, pero una planificación mala del Gobiernu asturianu dexó fuera a la candidatura asturiana de primeres. Nun primer llugar, desconociendo’l reglamentu de la convocatoria, presentaron una candidatura conxunta del área central del país –Xixón, Uviéu y Avilés–, pa depués correxir y apostar por Uviéu como aspirante pese a llevar un retrasu importante en comparanza coles otres candidatures. La descoordinación ente’l Gobiernu nacional y llocal condenó a Uviéu dende’l primer momentu.
 
Donostia va compartir el títulu de capital europea de la cultura 2016 xunto a la ciudá polaca de Wrocław poles rotaciones ente estaos impuestes hai años pol Conseyu y el Parllamentu europeos pa que tolos estaos miembros puedan acoyer esta celebración. Turku (Finlandia) y Tallin (Estonia) son les ciudaes que tán disfrutando d’esti privilexu esti añu.