El programa 'Don de lenguas' de 'Comando Actualidad' va emitise a les 22.30 hores en La 1

Esti miércoles, a les 22.30 hores, la primer canal de TVE va emitir el programa 'Don de lenguas' de 'Comando Actualidad'. La llingua asturiana ye ún de los idiomes que lu protagonicen.

Na televisión pública estatal yá ta promocionándose esti espaciu al traviés d'un spot de 25 segundos nel que nun se fai referencia al asturianu: namái pue vese una imaxe del 'Monumentu al Carmín' de la plaza Les Campes, en La Pola Siero, onde se grabó la segunda parte del reportaxe n'Asturies. El periodista catalán Ricard Sabaté tuvo como guíes a Xune Elipe y Xosé María García Sánchez ‘Llábana’ pa conocer la situación actual del idioma, que va mostrase nun reportaxe d'ente unos 10 y 12 minutos, según esplicó'l propiu reporteru.

Na web de 'Comando Actualidad' ta disponible esi curtiu espaciu promocional, onde se fala del silbo, chistabín (variante del aragonés), romanó y del propiu aragonés. Nun testu dientro de la páxina sí se noma l'asturianu xunto col estremeñu y la fala de Xálima.