Dolfo Camilo Díaz defende un “criteriu de calidᔠpal asturianu na TV autonómica

El representante d'Izquierda Xunida - Bloque por Asturies comentó a Asturies.com en que momentu s'alcuentra'l procesu de creación de los conteníos de la TV autonómica y qué sitiu va tener l'asturianu dientro de los mesmos.

La TV asturiana avanza pasín ente pasu. Los últimos díes del 2005 entamaron les emisiones en prebes, y esti fin de selmana la TV va tresmitir en directo colos sos propios medios el partíu que van disputar el Marino de Lluanco y la Cultural de Durango. Mientres la TV autonómica va dando pasos na creación de la so cadarma técnica y humana, cola entrada progresiva de la plantiya contratada al traviés de los estremaos concursos-oposición, la presencia que vaya tener l'asturianu nes emisiones del Ente públicu de comunicación ye entovía una incógnita que nin los mesmos miembros del Conseyu d'Alministración de la RTPA son quien a despeyar.

Dolfo Camilo Díaz, miembru d'esti órganu de dirección del Ente autonómicu en representación d'Izquierda Xunida Bloque por Asturies, comentó a Asturies.com qu'entovía ye ceo pa concretar qué conteníos n'asturianu va tener la emisora, en cuantes qu'entovía nun se pasó a iguar lo que va ser la parrilla de programación y entovía se ta en fase de facer les "bases doctrinales" de la mesma. De cualquier manera, l'escritor y representante d'IX-BA en Conseyu d'Alministración de la RTPA aseguró que ta plantegándose que dientro del perfil de la RTPA, que se quier que sía una TV con un conceptu d'actualidá, de serviciu públicu y mui informadora penriba d'otra clase de conteníos, esta tenga unos "conteníos xenéricos" en llingua asturiana que sían compatibles col restu de la programación. Dolfo Camilo nun quier falar de tantos por cientu y quier más asitiar el debate sobre la presencia del asturianu en términos d'afitar "un criteriu de calidá que se traduza nuna presencia de la llingua continuada a lo llargo del día y en distintos programes evitando los requexos". En cualquier casu, pa ver en que se concreta esa propuesta, Dolfo Camilo cree que va haber qu'esperar a que pasen los primeros meses del 2006, en cuantes que pel momentu tola cadarma de la RTPA entovía ta mui poco fecha no tocante a entrada del nuevu personal y otros aspectos.

No que cinca a les voluntaes que s'atalanten nel sen de la RTPA pa col asturianu, Dolfo Camilo atalanta que na composición de la directiva y conseyu d'alministración de la RTPA "mas qu'apreciar sensibilidá hacia l'asturianu lo que veo ye que nun hai insensibilidá, y esiste un ciertu acercamientu, con xente como Landeira que tan adoptando una postura bastante avanzada". De cualquier manera, el representante d'IX-BA nel Conseyu d'alministración de la RTPA ye consciente de qu'hai dificultaes pa la presencia del asturianu nel ente qu'identifica que vienen del partíu mayoritariu, que ta "multiplicando les presiones, colo que la sensibilidá cambia según les persones y el momentu". Dolfo Camilo reflexona que "posiblemente la RTPA tenga nel asturianu un de los sos temes mas polémicos, y incluso los cruzaos antillingua tan entrando con esto nuna dinámica de llocura conceptual. La virulencia cola qu'estos sectores ataquen incluso a dalgo como l'asturianismu da una clave sicosocioloxica, y ye porque nos tienen como una pantasma na que proyecten mieos que tomen de casos d'otres llatitúes, lo que-yos lleva a esaxerar, y dacuando armar grandes espolinos".