Dixebra y De Miguel, Wolfe y Quintana protagonicen la fin de selmana musical n’Asturies

La sala Quattro d’Avilés acueye esti vienres el conciertu conmemorativu del 25 aniversariu de Dixebra. Mentes, el sábadu, De Miguel, Wolfe y Quintana presenten el so ‘Xota pa tres’ nel Teatru Filarmónica d’Uviéu.
 
Xune Elipe, cantante de Dixebra, promtete pa esta nueche (22.30 hores) una gran “fiesta de cumpleaños” na que l’ambiente na histórica discoteca avilesina ta garantizao, yá que de manera anticipada vendiéronse más de 300 entraes. El grupu tien preparao pa güei un ‘set-list’ con más de 30 cantares, ente ellos clásicos de la banda como ‘Merucu Xusticieru’, ‘Xuacu xinta xorra’ o ‘Duérmite neñu’, y samplers nuevos que van facer baillar a los presentes per más de dos hores. Una fecha que, ensin dulda, va ser recordada por munchos años, al igual que’l décimu aniversariu de la banda en Corvera o’l vixésimu d’Avilés. El preciu de la entrada na puerta ye de 15 euros.
 
Pal sábadu, la cita cola música asturiana va tar nel Teatru Filarmónica (20.30 hores). De Miguel, Wolfe y Quintana presenten n’Uviéu’l so primer discu, ‘Xota pa tres’, con una actuación especial na que Xosé Antón Fernández ‘Ambás’ va facer de maestru de ceremonia. “Los nuesos conciertos son siempre una sorpresa gracies a la calidá musical Mapi y de Jacobo (De Miguel)”, esplica Michael Lee Wolfe, qu’anima a tolos asturianos a averase al teatru uviedín a presenciar l’actuación d’esti tríu que ta dando tanto que falar. Les entraes pa esti eventu tán a la venta por 12 euros.