Dixebra y Corquiéu van mover La Flor de Ḷḷena

Les dos bandes asturianes van protagonizar la nueche del sábadu del Mercáu Tradicional, mentes que la formación Slum Suit, con orixe en New York, va tocar el domingu.

La Pola Ḷḷena celebra esta fin de selmana les fiestes de La Flor y, un añu más, y yá van quince, nun podía faltar el Mercáu Tradicional nel barriu La Caleya. La Xunta Cultural Rebelgu torna a organizar esti eventu tres la decisión del añu pasáu del Conciyu de ceder la edición anterior a la Banda Gaites Güestia, aición sofitada por tolos grupos municipales menos por Compromisu por Ḷḷena, siendo ésti'l coleutivu más veteranu nel entamu d'una folixa que punxo en marcha Pies Xingones.

Más de 60 puestos d'artesanía y comida conformen esti mercáu, que cuenta con una gran cantidá d'actividaes culturales mientres los sos dos díes de llargor. El sábadu va abrir les sos puertes a les 11 hores con una alborada de la Banda Gaites Güestia, tando programada pa pela tarde, a les 17 hores, l'Alcuentru Folklóricu La Flor de Ḷḷena, cola participación del grupu de baille La Flor de Xanzaina y les sos pandereteres, Los Zamarrones y la bandina tradicional La Xarangana.

Pa les 19 hores ta previstu un pasucais y una representación de Bailadera Títeres, mentes qu'a les 20 hores el Circo en La Luna va presentar el so espectáculu de malabares 'Serabalam Zyrkus'. La folixa va allargase hasta bien entrada la madrugada colos conciertos de la formación folk Corquiéu y de la banda de rock referente en llingua asturiana Dixebra, a partir de les 22 hores.

L'apertura del mercáu'l domingu va ser tamién a les 11 hores, con un pasucais protagonizáu por una pareya de gaiteros, cola posibilidá de poder disfutar del espectáculu 'Serabalam Zyrkus' otra vuelta a les 13 hores. Yá na tarde, que va tar amenizada pola bandina tradicional L'Andecha Tuercipié, Seis Conceyos va poner xuegos tradicionales a les 17 hores, mentes qu'a les 18 hores va comenzar el concursu d'echadores de sidra.

El festival de canción asturiana, cola participación de Vicente Prado 'El Pravianu' y Celestino Rozada, va principiar una hora más tarde, pa poner el ramu al mercáu Slum Suit nel chigre a les 20.30 hores. Esti grupu nació en New York de la mano del gaiteru asturianu emigrante Carlos Casado y ta formáu por músicos de delles nacionalidaes.

La 'jira', el llunes

El Conciyu Ḷḷena tamién entama un destacáu programa de festexos pa estos cuatro díes que finen el llunes cola tradicional 'jira' al prau de La Flor. Ente les munches actividaes va haber trés verbenes coles orquestes Dominó y Ángel América (mañana), Capitol y Dúo Fusión (sábadu), y Vivian's y el Dúo Nuevo Día (domingu).