Dixebra yá trabaya na grabación del so discu d’estudiu nuevu

Los componentes de Dixebra principiaron esti martes la grabación del discu nuevu de la banda. L’estudiu uviedín Distrito Federal ye’l llugar escoyíu nesta ocasión pal rexistru de los temes, que traten sobre l’actualidá d’Asturies y del mundu.

 

En total van ser quince los cantares que recueya esti discu, el decimosegundu de la banda nos sos 26 años de vida, pieces nos que va trabayar Dani Sevillano como téunicu de soníu y Tana Díaz y Rubén Álvarez como productores. Los temes van tocar dellos palos musicales, dende’l rock al punk, pasando pol reggae, el ska, el funk, el folk, el metal o’l rap, con “guitarres dures y afilaes, base rítmica contundente, pero tamién momentos melódicos, ukelele, ‘banjo’, dobru, congues, acordión, sección de vientu completa –trompeta, saxu y trombón– o teclaos”, señalen dende la formación avilesina. Sobre les lletres, éstes van tratar sobre l’actualidá asturiana y mundial, “con testos qu’enllacen el pasáu col presente y referencies a la historia contemporánea d’Asturies”.  Nesti sen, Dixebra quier ufiertar espacios “pa la reflexón y la denuncia, con un tonu xeneral de llamada a l’acción”. El guitarrista Primi Abella ye l’autor d’una gran parte d’elles, anque tampoco falten composiciones de collaboradores habituales de la banda, como Quique Faes o Pablo Texón.

 

Dixebra va anunciar el nome definitivu del discu nes selmanes próximes, asina como la fecha del conciertu de presentación del trabayu. Ésti va tener llugar, con casi toda seguridá, esta seronda y nél va tar disponible pal públicu esti álbum tán esperáu polos munchos siguidores de la banda avilesina de dientro y de fuera del país.