Dixebra va presentar en directu ‘Tiempos Modernos’, el 15 de payares na Casa de la Cultura d'Avilés

|

La Casa de la Cultura d’Avilés va acoyer el 15 de payares, a les 20.30 hores, el directu de la mítica banda de rock asturiana ‘Dixebra’, presentando'l so nuevu trabayu. Va ser un conciertu especial, con dellos invitaos y un repasu a la so carrera.

“Tiempos Modernos”, faciendo referencia al filme de Chaplin, ye'l so discu númberu dolce, dende la so nacencia en 1987. Presenta quince composiciones que se mueven ente'l rock, el punk, el folk, el metal o'l ska-reggae, con un amiestu d’estilos yá característicu nel grupu. Col propósitu de consiguir un soníu capaz de prindar la fuerza y l'espontaneidá del directu, el baxu, la guitarra y la batería grabáronse simultáneamente, incluyendo darréu'l restu d’instrumentos pa los que tamién cuntaron con diverses collaboraciones. La resultancia ye un discu con un soníu contundente y natural, con xunes cantares que traten temes d’actualidá, enllazando pasáu y presente yá incluyendo referencies a la hestoria contemporanea d’Asturies.

El conciertu va ser una actuación especial na que van participar dalgunos de los músicos convidaos na grabación, casu de Toño Gómez (trombón), Javier Tejedor (acordión), Vito Álvarez (voz) o’l raperu asturcolombianu Shálom. La primer parte va tar dedicada al nuevu álbum, con montaxes de vídeu inspiraos nes lletres realizaos por Guillermo Fernández pa la ocasión. La segunda metá va faer un repasu a la so carrera y a les canciones más queríes polos sos siguidores, que s'espera qu'alleguen en gran númberu p'arropar a la banda. Les entraes yá s'atopen a la vienta a un preciu de 12 euros si se mercan antemanadamente y 15 euros en taquilla'l mesmu día del conciertu: el 15 de payares a les 20.30 hores nel auditoriu de la Casa de la Cultura d’Avilés.

 

Contador Estadistiques