Dixebra va celebrar el so 25 aniversariu en casa con un conciertu en Quattro'l 30 de marzu

Avilés va acoyer finalmente’l conciertu conmemorativu del 25 aniversariu de Dixebra’l vienres 30 de marzu a les 22.30 hores. El sitiu escoyíu ye la histórica sala Quattro, mesmu llugar onde la banda avilesina presentó’l ‘¿Asturies o trabayes?’ nel 1993.
 
Tres negociar colos conceyos d’Avilés y Xixón, y mirar otres alternatives como’l Centru Cultural Internacional Avilés (Niemeyer), la banda referente del rock asturianu decidió celebrar el so 25 aniversariu na Quattro, una sala bien conocía por Dixebra, yá qu’ellí ufrieron dellos conciertos nestros cincos llustros de vida. Ente ellos, ún bien recordáu: el de la presentación del segundu discu de la banda, el ‘¿Asturies o trabayes?’. “Quattro dionos munches fecilidaes y ye una de les meyores sales de conciertos qu’hai n’Asturies”, señala Xune Elipe, cantante y fundador de Dixebra, que recuerda de manera especial esi conciertu del 1993 “nel que convidamos a Asturtralla, banda avilesina que cantaba n’asturianu, y a Avientu’”.
 
Nesta ocasión, Dixebra va actuar en solitariu, anque ta prevista la collaboración de dellos músicos y dalguna qu’otra sorpresa. “Nel ensayu d’esta fin de selmana vamos entamar a concretar los detalles del conciertu, pero lo que ta decidío ye que vamos ufrir al públicu un set-list mui clásicu, con temes qu’hacía años que nun tocábemos en direutu, como ‘Merucu xusticieru’ o ‘Xuacu xinta xorra’”, adelanta Elipe. Asina, los siguidores de la banda van poder sentir bona parte de los cantares recoyíos nel recopilatoriu ‘Dixebra XXV (1987-2012)’, que vio la lluz n’avientu y que sorprendió al propiu grupu poles altes ventes, amás de pieces de los discos últimos.
 
El preciu p’asistir a esti conciertu históricu de la banda, que se xune al de Corvera del décimu aniversariu y al d’Avilés de los 20 años, ye de 12 euros anticipada y de 15 euros na puerta. Les entraes yá se pueden mercar per Internet en www.epticket.com, anque nos díes próximos van tar tamién disponibles en Paradiso, El Baruku y Café Trisquel (Xixón); El Último Mono, L’Esperteyu y EP Management (Uviéu); El Cafetón y El Cabanón (Avilés) y L’Abellugu (Mieres). La hora d’entamu de l’actuación ta prevista pa les 22.30 hores.
 
Xira 2012
 
El conciertu d’Avilés va tener continuidá’l 14 d’abril en Madrid, na Sala Taboo. Dixebra quier llevar a l’amplia comunidá asturiana y los sos munchos siguidores na capital castellana esta celebración especial, pa lo que van mantener el mesmu set-list qu’en Quattro. El preciu pa esti conciertu, previstu pa les 22.30 hores, ye tamién de 12 y 15 euros, y los interesaos yá pueden mercar les entraes en www.epticket.com.
 
Tamién nel mes d’abril, tovía con fecha por confirmar, la banda avilesina va actuar en L’Infiestu pa l’Asociación Músico Cultural Pepe Bocanegra “nuna sala pequeña, lo que va ser un poco la vuelta a los nuesos oríxenes, cuando tocábemos en chigres”, apunta Elipe. Mentes, a finales de mes, el día 28, Dixebra yá tien confirmada la so presencia nel XXIV Conciertu pola Oficialidá. Esi mesmu día, pero de xunetu, los avilesinos van desplazase a Candás pa participar na Nueche Celta, qu’esti añu vuelve a organizase.