Dixebra, Skama la Rede y Escuela de Odio encabecen el Maízu Rock

|
Cartelu VII Maízu Rock

El festival d'Intriago dívidese en dos xornaes, la primera dedicada al concursu de bandes.

Un añu más esti llugar del conceyu de Cangues d'Onís acueye bandes consolidaes de la escena asturiana y otres con menos nome, anque muncha calidá. Celébrase'l VII Maízu Rock, eventu autoxestináu con entrada de baldre y zona d'acampada pa los que quieran facer nueche.

Mañana, na xornada principal del certame, encabecen el cartelu dos grupos bien conocíos qu'empleguen la llingua asturiana, Dixebra y Skama la Rede, a los que se xunta otra formación compremetida pa col idioma, Escuela de Odio. Completen el festival, que va comenzar a les 20.30 hores, La Morgue y Polémika, amás de los cántabros Saco Roto.

Sicasí, l'actividá del Maízu Rock va comenzar estar tarde col concursu de bandes. Los clasificaos pa la final son Rencor Absoluto, Hasta Atrás, The Broke, Sin Emu, TRT, Mature, La Mueska y Bad Cream.

Recoyida d'alimentos

El Maízu Rock nun quier quedar namái nun festival de música, apostando tamién pola solidaridá. Mientres el certame va entamase un puntu de de recoyida d'alimentos non perecederos que nun lleven gochu, artículos d'hixene y comida pa críos pal so repartu a cargu de l'asociación Alendar Asturies ente los refuxaos del campamentu de Katsikas, en Grecia.

 

Contador Estadistiques