Dixebra presenta’l videoclip de ‘Sigue’l tren’

El proyeutu ‘Dalgo nuevo, dalgo vieyo, dalgo emprestao’ entamáu por Dixebra pol so trentenu aniversariu da’l primer pasu cola estrena del cantar nuevu grabáu pa la ocasión. Trátase de ‘Sigue’l tren’, tema que la banda vien tocando na so xira ‘Tour 87-17’.

El realizador xixonés Javier Lueje, que yá trabayara cola banda con ‘Nun llores’, ye’l responsable del primer de los trés videoclips previstos pol grupu pa esti añu. Nél intercálense imáxenes de tolos integrantes de Dixebra tocando, grabaes en Fotohof-Imagen, con otres de Xune Elipe, cantante de la formación, na uvieína antigua Fabrica de Loza, faciendo asina un xuegu visual llamativu y atractivu.

‘Sigue’l tren’ trátase d’un tema de composición nueva que repasa la trayeutoria de Dixebra, faciendo referencia a personaxes o cantares venceyaos a la historia del grupu avilesín. Los sos siguidores yá pudieron sentila nos conciertos en direuto de la xira ‘Tour 87-17’ que va continuar nel mes de xunu con cuatro feches confirmaes: Comillas (Beltane Fest, 10 de xunu), Xixón (Conciertu pola Oficialidá, 17 de xunu), Tresona (23 de xunu, San Xuan) y Valmori (24 de xunu).