Dixebra, Los Berrones y Vicente Díaz, finalistes nel premiu al meyor cantar n’asturianu

L'Academia de les Artes y les Ciencies de la Musica fizo públicos ayeri pela tarde los finalistes en toles categoríes de los Premios de la Música que concede cada añu. Dientro de la categoría de meyor cantar n'Asturianu, premiu que llega con esta a la so tercer convocatoria, el tríu de finalistes ígüenlu'l grupu de Tolivia "Los Berrones" col cantar "Fai Deporte", el grupu avilesín Dixebra col tema "Somos" y el cantante d'Avilés Vicente Díaz col tema "El café del pescador" compuestu por Pepín Robles.

Ún tema de rock por parte de Los Berrones, otru de rock con un fuerte sabor discotequeru de mano de Dixebra y un tema de canción llixero na voz de Vicente Díaz, son la escoyeta de l'Academia de la música na tercer convocatoria del premiu al meyor cantar n'asturianu. Dos artistes veteranos que nunca nun tuvieren nominaos enantes, como ye'l casu de Dixebra con "Somos" tema inxertu nel so discu "Ensin novedá" y como ye tamién el casu de Los Berrones, que lleguen al tríu final col cantar "fai deporte" que grabaron en collaboración con un garapiellu de deportistes asturianos d'élite, ente ellos los ciclistes Santi Pérez, Chechu Rubiera, Benjamín Noval o Samuel Sánchez, los futbolistes Samuel Baños, Pablo Álvarez y Paul Folgueras, l'árbitriu Mejuto González, la karateka Noelia Fernández o l'alpinista Rosa Fernández, col oxetivu de recaudar perres pa una causa benéfica a primeros del 2005.

Xunta los dos debutantes, una presencia fixa que repite en toles convocatories del premiu dende'l 2004 na persona de Pepín Robles, que ganare'l premiu na edición inaugural del 2004 col tema "nunca mais" cantar qu'interpretaba Manolo Morán y que crió un gran espolín ente la comunidá musical asturiana, qu'entendió mayoritariamente que la obra de Robles nun yera representativa de la música n'asturianu que se facía nesti país. Nel añu 2005, Pepín Robles nun ganó'l premiu, que foi pa "Agora sal a baillar" de Chus Pedro, pero volvió a esmucise ente la llista de nominaos col cantar "La Pola de Siero" qu'escribió pal intérprete Vicente Díaz, un clásicu de les romeríes de prau d'Asturies col que tamién repite nesti 2006. El resultáu va sabese nel mes de mayu cuando va ser la gala d'entrega de los premios.