Dixebra debuta nel Festival Arcu Atlánticu

|
Dixebra

Va facer una parada nueva en Xixón dientro'l 'Tour 87-17' pol so trentenu aniversariu.

Dixebra va repetir esta nueche (22 hores, Plaza Mayor) en Xixón, depués de la so actuación nel Conciertu pola Oficialidá, no que va ser el so debú nel Festival Arcu Atlánticu. El grupu avilesín ta de celebración esti añu, al cumplir trenta enriba los escenarios, y los sos munchos siguidores tán disfrutando d'una xira na que nun falten temes clásicos de la banda.

Pal conciertu d'esta nueche, Dixebra va reforciase con Toño Gómez al trombón, que tamién va tar presente nel conciertu especial que va dar Dixebra nel Espace Marine del Festival Interceltique de Lorient el 8 d'agostu. Un formatu que va repetise el 17 de setiembre nes fiestes uvieínes de San Mateo, onde va ser grabáu pa emplegar les imáxenes pa un documental sobre la historia d'Asturies nos 30 años últimos al traviés de los cantares del grupu.

Restu de cites

El VI Festival Arcu Atlánticu va continuar nos díes próximos con cites destacaes no musical. Mañana'l gaiteru Bras Rodrigo va presentar el so trabayu 'A pause in New York' a les 22 hores, mentes que'l sábadu van actuar los bretones An Tri Dipop, Herbamora y los gallegos Xabi Díaz y Adufeiras de Salitre a partir de les 21.30 hores.

Contador Estadistiques