Dixebra, cabeza de cartel en sofitu a los trabayadores de Menasa

Dixebra va actuar en Sama esti vienres, onde encabeza cartel xunto col veteranu grupu de rock de la cuenca'l Nalón Stukas y la banda llavianeta Los Berrones nun conciertu en sofitu a los trabayadores de la empresa MENASA y nel que tamién participen los grupos Tomás y los demás, Martagón Trío, Toni Penicilina y Los Frixuelos Eléctricos. Toos estos grupos van facer mañana la so musica en directo nuna actuación a beneficiu de los trabayadores de la empresa Menasa qu'organicen el sindicatu Comisiones Obreres y la estaya de mocedá d'Izquierda Xunida nel Nalón en collaboración col colectivu de muyeres de los trabayadores de la empresa. Ello va ser en Teatru Llangréu de Sama a les 21:00h, costando la entrada a beneficiu de los trabayadores trés euros


Amás del conciertu, güei xueves 12 va tener llugar dende les 7 de la tarde na Casa Cultura de La Felguera una mesa redonda na que baxo'l títulu "Perspectives de futuru na Cuenca" van falar Juan Iglesias, secretariu xeneral de la UJCE, Pablo Prieto, responsable de la Plataforma Xuvenil de Turón (Mieres), el sociólogu alemán Holm Dietev Köhler y el Director Xeneral de Rellaciones Esteriores del Gobiernu asturianu Darío Díaz.

Los trabayadores de la empresa Metalúrxica del Nalón - Menasa, una fundición asitiada en Lada (Llangréu) dexaron de cobrar el pasáu mes de mayu del 2005. Nel branu del 2005 la empresa dexó de trabayar y d'atender pidíos que, con too y con ello, siguíen llegando al fax de Menasa, lo que llevó a qu'en en setiembre los sindicatos firmaren un espediente de regulación d'emplegu temporal pa que la plantiya pudiere cobrar del paru. Trabayadores y sindicatos lleven meses tentando qu'Industria negocie un plan pa reflotar la empresa, que-yos abulta que ye viable dafechu. Mentanto, un grupu de trabayadores de Menasa lleven yá más de 175 díes trancaos na sede de la empresa en demanda de la solución.