Dixebra actúa en Lleón per primer vez nos sos 26 años de vida

La sala Studio 54 de Lleón acueye esti sábadu’l primer conciertu de Dixebra nel país vecín nos sos 26 años de vida. Pela so parte, Fernando Valle Roso lleva esi mesmu día los cantares del so discu ‘Camín d’ayures’ a Cangas del Narcea.

Los miembros de Dixebra esperen con ilusión l’actuación de mañana, un eventu especial tamién pa los munchos militantes del movimientu de reivindicación del asturlleonés al sur del cordal. Amás, la banda avilesina va aprovechar la ocasión pa presentares dellos cantares del so discu próximu, que pretende asoleyar a lo llargo d’esti añu. El conciertu va principiar alredor de les 23.30 hores y la entrada cuesta 10 euros, anticipada, y 12, na puerta.

Otra manera, Cangas del Narcea va ser la parada próxima de Fernando Valle Roso dientro de la xira de presentación del so discu ‘Camín d’ayures’, el primeru en solitariu del cantante de Llangréu. Nesta actuación va tar acompañáu por Xaime Arias (pianu), Michael Lee Wolfe (guitarra), Pablo Carrera (gaita) y Silvia Moreno, Carla Antuña y Carla Isidoro (coros). L’actuación va tener llugar mañana nel Teatru Conde Toreno a les 20 hores y les entraes yá tán a la venta na Casa de Cultura a un preciu de 5 euros. El sábadu próximu Valle Roso va cantar en casa, en La Felguera.