Dixebra abre'l Festival Internacional de Cerveza Artesano de Llangréu

L-R, Los Pinflois, Koma o Novedades Carminha son dalgunos de los grupos que toquen nesta edición del certame, que va contar con 16 puestos de productores.

Los meyores cerveceros del panorama estatal y una escoyeta de grandes cerveceros internacionales participen dende güei y hasta'l domingu nos xardinos de la Pinacoteca Municipal Eduardo Úrculo nel Festival Internacional de Cerveza Artesano de Llangréu (FICAL), que va tener na música, xunto con esta bébora, el so gran atractivu. Dixebra y los navarros Koma van ser el platu fuerte del primer día d'una celebración que pasa del sábadu al vienres los soníos más contundentes pa dar entrada al indie.

Esti añu van contar con puestu nel FICAL Cotoya, Santo Cristo, Beavertown, Dougall's, Redneck, Garage, La Pirata, 3 Monos, Naparbier, Península, D'Equí, Caleya, Laugar, Chimay, Basqueland y Moor, pa sumar un total de 16 productores de dientro y fuera d'Asturies. Tamién va haber una importante ufierta de comida y delles charres de temática cervecera a lo llargo de los trés díes.

Cartelu musical

La música ye una parte importante del festival llangreanu dedicáu a la cerveza artesano. Esta nueche van actuar nel escenariu principal Radioctive Monkeys (21.30 hores), Atomic Zeros (22.15 hores), los vallecanos No Konforme (23.20 hores), Koma (00.40 hores) y Dixebra (2.30 hores).

Mañana van tocar Sr. Chinarro (22 hores), Los Punsetes (23.30 hores), Novedades Carminha (00.40 hores) y Kokoschka (2 hores), mentes que'l domingu'l turnu va ser pa Los Pinflois (14 hores) y L-R (17 hores), dambos nel escenariu pequeñu. La entrada al recintu los trés díes ye de baldre.

Na semeya, un momentu del montaxe de les carpes de FICAL.