Dixebra abre nel Albéniz la xira ‘Bailla la Crisis’

|

L’actuación de Dixebra esti vienres (21.30 hores) na xixonesa Sala Albéniz centra l’atención musical d’esta fin de selmana. Los 300 primeros asistentes al conciertu van recibir un CD con cinco cantares inéditos de la banda.
 
Esti discu, que nun va vendese nos comercios, ta formáu por dos temes inéditos que quedaron fuera de ‘Amor Incendariu’ al nun tar na mesma llinia que’l resto del álbum, 'Más que dos' y 'Yá cansé'; ‘Gaiteru’, una versión del tema de los gallegos Os Diplomáticos de Monte Alto; y dos ‘remixes’ de cantares tradicionales de Dixebra fechos por Sergio Rodríguez, ‘Duérmete neñu’ y ‘Pal Caribe’. L’actuación de Xixón va ser la primera d’una llarga xira na que, per vez primera, los asturianos van salir a tocar más fuera d’Asturies que nel país. Hasta la fecha, Dixebra yá tien confirmaos conciertos en Zaragoza (16 d’abril, Sala López), La Pola L.lena (30 d’abril, Mercáu Astur), Madrid (14 de mayu, Sala Taboo), Trasona (23 de xunu, Foguera de San Xuan) y Ourense (24 de xunu, Derrame Rock).
 
El conciertu d’esta nueche, que tien un preciu de 15 euros, va principiar a les 21.30 hores y va ofrecer delles sorpreses. Nél, Dixebra tamién va estrena ‘set-list’ con presencia de cantares míticos de la banda como ‘Esto ye Asturies’ o ‘Vientu na cara’.
 
Na axenda musical d’esta fin de selmana n’Asturies tamién destaca l’actuación de Darbukka d’esta tarde, a les 20 hores, nel Centru Cultural Caxastur Jerónimo Ibrán 10 de Mieres. Esta banda folk del occidente del país cuenta con dos trabayos publicaos, ‘Fálala’ y ‘Sete sones’, con temes en gallego-asturiano. El sábadu nel mesmu conceyu, nesti casu en Cenera, ta previsto un conciertu de Mestura (20 hores, Casa la Cultura).
 
Otros conciertos destacaos d’esti vienres son los de Christina Rosenvinge (22 hores, Acapulco) y Luis Eduardo Aute (20.30 hores, Teatru Xovellanos) en Xixón. Mentes, pal sábadu, va celebrase un conciertu de Spit (21 hores, Acapulco) y el Festival Ónde Ye-ye (21 hores, Sala Nunca Jamás d’Uviéu) coles actuaciones de Las Nurses, Sonido Alfredo y Mano Lyn Experience.

Contador Estadistiques