Dixebra abre la xira 30 aniversariu en Valles

|
Cartelu Dixebra en Valles

El llocal de l'Asociación Músico-Cultural Pepe Bocanegra va acoyer el sábadu’l primer conciertu del ‘Tour 87-17’, xira cola que Dixebra celebra'l so 30 aniversariu. La banda avilesina pretender conmemorar en Valles aquelles actuaciones en sales d'aforu reducíu de los sos anicios.

D'igual forma, Dixebra quier con esti entamu de xira en Piloña “amosar el so apoyu y almiración pol llabor d’esta asociación, que tien una de les meyores programaciones musicales del país, al mesmu nivel o superior que munches de les organizaes por estamentos oficiales. Amás, la presencia avezada de bandes asturianes fai d'ella un escaparate del bayurosu movimientu musical d'esta tierra”. Ésta ye la segunda ocasión nel que Dixebra actúa en Valles, yá que nel 2012 participó nel ciclu ‘Alcuentros de Músiques feches n’Asturies’ que celebra'l coleutivu tolos años.

Aparte de poder revivir aquellos primeros años de conciertos en sales pequeñes de Dixebra, los siguidores tamién van conocer el repertoriu que la banda tien preparada pal ‘Tour 87-17’. “Vamos recuperar temes qu’hai cuantayá que nun tocamos y que nos apetez volver a facelos en directo. Nun van faltar tampoco dellos ‘himnos dixebriegos’ o dalguna novedá. Amás vamos incluyir samples nuevos y, eso sí, mantener l'espíritu folixeru y dinámicu de los nuestros conciertos”, esplicó recién el vocalista Xune Elipe nuna entrevista a Asturies.com.

L'accesu al llocal pa los socios de l’Asociación Músico-Cultural Pepe Bocanegra va abrise a les 21.45, mentes que'l restu de públicu va poder entrar, hasta completar aforu, de magar les 22.45. La hora prevista de comienzu del conciertu ye les 23.15 hores.

Restu de xira

Dixebra entovía nun confirmó la totalidá del ‘Tour 87-17’, anque sí avanza qu’hai actuaciones previstes en Llanera, Xixón, Uviéu, Ribeseya, Ḷḷena, Mieres, Llangréu, Siero y Llanes. D'igual forma, va haber conciertos fuera del país, con presencia en festivales como’l Beltane Fest de Comillas (10 de xunu), onde va compartir escenariu con Soziedad Alkoholika, Riot Propaganda, Zoo, Silenciados y Los Perezosos.

Contador Estadistiques